Kreu i partisë së vulës, Lulzim Basha ka vijuar edhe një ditë pas Kuvendit ku u miratua Amnistia Penale, sulmin kundër kryeministrit Edi Rama dhe kryetarit të PD-së, Sali Berisha.
Gjatë një takimi me mbështetësit e tij, Basha u tha se Rama ka një vit që po godet SPAK dhe janë duke i future shkopinj nën rrota.
Duke iu referuar edhe deklaratave të Dumanit gjatë publikimit të raportit, Basha tha se Rama nuk i jep personel SPAK dhe nuk po e mbështet, ndërsa deputetët e djathtë I bëri përgjegjës për bashkëpunim me Ramën dhe dhënien e votave për lirimin e një pjese të dënuarish dhe kanë lënë në ndjekje penale dhjetëra protestues.
“Kanë një vit e gjysëm që i fusin shkopinj nëpër rrota SPAK-ut, që i presin buxhetin, nuk i japin personelin e mjaftueshëm, kanë filluar ta godasin politikisht.
I pari Edi Rama që i thotë BKH-së “kush je ti që vjen e kërkon te ne”, “sillu më mirë” – i thotë.
Byrosë Kombëtare të Hetimit i thotë silluni më mirë me zyrat e shtetit. Pra ky që në fakt duhet të mbyll gojën para BKH-së, para SPAK-ut, sepse këta prandaj janë krijuar kundërkorrupsionit, ka filluar tani t’i kërcënojë, i quan “republikë prokurorësh”.
Dhe papritur shohim palën tjetër, pazarxhinjtë e vërtetë në krah të Edi Ramës.
Si? Fare e qartë. Dje të paktën 10 apo 15 nene të amnistisë përfitues janë zyrtarë të korruptuar për tendera, për korrupsion aktiv, për korrupsion zgjedhor
Janë aty, e zezë mbi të bardh. Pra, ata deputetë që i thonë vetes deputetë të Partisë Demokratike, ngritën kartonat për të amnistuar drejtorët e korruptuar të Edi Ramës.
Ndërkohë që kanë lënë në ndjekje penale jo dhjetëra por qindra protestues demokratë të cilët nuk përfitojnë nga amnistia e djeshme. Sepse janë kthyer në aneks të partisë socialiste dhe të Edi Ramës”, tha Basha.
