Kreu i Grupit të PD, Gazment Bardhi është shprehur se kjo është një këmbanë alarmi në protestën e organizuar para Bashkisë së Tiranës për dosje 5D ku ranë në pranga 5 drejtorë për korrupsion.
“E kemi për detyrë të jemi në mbështetje të qytetarëve të Tiranës që janë sot në këtë protestë të shoqërisë civile. Pa asnjë diskutim që përbën shkak arrestimi i drejtorëve të Bashkisë të Tiranës. 5 zyrtarë, njerëzit më të afërt të Erion Veliaj, për një periudhë të shkurtër i kanë dhënë vetes 22 mln euro, është një kambanë alarmi se në çfarë derexheje ka shkuar qeverisja vendore dhe lokale. Erion Veliaj nuk do të duhet të ishte në zyrën e kryetarit të bashkisë, por duhet të ishte në qeli me 5 vartësit e tij.
Ka shumë arsye për të protestuar. Kjo është një arsye, ky nuk është rast i shkëputur, E njëjta skemë është edhe në drejtorinë e Rrugëve, nëse hetoni është skemë e shtrirë në çdo bashki të vendit dhe institucion qendror. Opozita do të duhet ti prijë qytetarëve për të larguar nga qeverisja këta që gllabërojnë buxhetin dhe paratë e taksave të shqiptarëve”, tha Bardhi.
Opozita po proteston këtë të premte para Bashkisë së Tiranës, pas aferës “5D”, ku disa prej drejtorëve të kësaj Bashkie kishin përfituar miliona euro tendera nga kjo bashki apo institucione vartëse të saj me kompaninë e tyre “5D Konstruksion”, që sipas SPAK, pronarët “de facto” të saj ishin Mariglen Qato dhe Redi Molla.
