Gjykata e Posaçme kundër Korrupsionit dhe Krimit të Organizuar ka njohur këtë të enjte ish-kreun e Drejtorisë së Transportit të Trafikut Rrugor në Bashkinë e Tiranës, Enton Punavijan me masën e sigurisë “detyrim paraqitje”.
Në lidhje me dosjen “5D”, ai akuzohet nga SPAK për veprën penale “Shkelja e barazisë së pjesëmarrësve në tendera apo ankande publike”, të kryer në bashkëpunim.
Ai është pjesë e dosjes bashkë me tre ish-drejtorët e arrestuar Mariglen Qato, Taulant Tusha, Redi Molla dhe 5 zyrtyarët e tjërë nën hetim, por për shkak se nuk ndodhej në Shqipëri kur u krye operacioni, u caktua një datë tjetër për seancën.
Ata janë nën hetim në lidhje me tenderat e Bashkisë së Tiranës dhe institucionet vartëse të saj, të fituara nga kompania “5D Konstruksion” sh.p.k., e cila ka patur dhe emrat “Igor Elektrik” sh.p.k dhe “V.A.S Konstruksion” sh.p.k. ku sipas Prokurorisë së Posaçme, pronarët “de facto” të saj janë Redi Molla dhe Mariglen Qato.
Kompania “5D Konstruksion” me pronar hije Mariglen Qaton dhe Redi Mollën ka përfituar milionba euro tendera nga Bashkia e Tiranës.
“Nga burimet e provave të mbledhura në kuadër të hetimeve të këtij procedimi penal janë krijuar dyshime të arsyeshme se shtetasit Redi Molla dhe Mariglen Qato janë ortakët e vërtetë dhe pronarët “de facto” të shoqërisë “5D Konstruksion” sh.p.k. Shtetasit Redi Molla dhe Mariglen Qato e kanë zotëruar këtë shoqëri tregtare në mënyrë indirekte, duke përdorur persona të tjerë, shtetasit Eduard Meta, Muhamet Petriti dhe Nestor Muhametllari, si ortakë fiktiv në aktet e rregjistrimit dhe funksionimit të shoqërisë, me të cilët ortakët e vërtetë të shoqërisë kanë pasur lidhje shoqërore dhe lidhje miqësore.
Nga veprimet hetimore të kryera është provuar fakti se shoqëria tregtare “V.A.S Konstruksion” sh.p.k e njëjtë me “5D Konstruksion” sh.p.k, ka marrë pjesë dhe është shpallur fituese në kundërshtim me rregullat e prokurimit publik, në disa procedura prokurimi të organizuara nga autoriteti kontraktor Bashkia Tiranë.
Janë krijuar dyshime të arsyeshme se shtetasi Taulant Tusha në cilësinë e Drejtorit të Përgjithshëm të Drejtorisë së Planifikimit të Punëve Publike dhe të anëtarit të Komisionit të Vlerësimit të Ofertave, si dhe shtetasit Enton Punavija, Julian Zanaj dhe Albano Janku në cilësinë anëtarit të Komisionit të Vlerësimit të Ofertave, në disa procedua prokurimi, e kanë favorizuar dhe i kanë krijuar këtij subjekti tregtar avantazhe dhe privilegje të padrejta në raport me operatorët e tjerë ekonomikë që kanë marrë pjesë në procedurat e prokurimit, duke e shpallur fituese të procedurës së prokurimit në mënyrë të parregullt dhe në shkelje të rregullave të prokurimit publik. Ekzistojnë dyshme të bazuara se shtetasi Taulant Tusha ka pasur dijeni në lidhje me ortakët e vërtetë të shoqërisë “5D Konstruksion” sh.p.k dhe ka favorizuar këtë shoqëri tregtare duke ditur se cilët persona kanë qënë zotëruesit indirekt të aksioneve të shoqërisë.” thuhet në hetimet e SPAK sa i përket hetimeve për Enton Punavijan.