Një person i shpallur në kërkim ndërkombëtar nga drejtësia shqiptare është arrestuar në Matera të Italisë. Në kuadër të operacionit policor të koduar “Verdikti” është vënë në pranga shtetasi Gjovalin Lesi, 55 vjeç, i lindur në Rubik.
Në vitin 1997 Gjovalin Lesi ka vrarë me armë zjarri kallashnikov pas një konflikti për motive të dobëta, kunatin dhe motrën e tij. Për këtë vepër penale ai është dënuar me burgim të përjetshëm.
“Gjykata e Mirditës, në vitin 1998, e ka dënuar shtetasin Gjovalin Lesi, me burgim të përjetshëm, për veprat penale “Vrasja me paramendim” dhe “Mbajtja pa leje dhe prodhimi i armëve, armëve shpërthyese dhe i municionit”. Më datë 21.10.1997, në Rubik, pas një konflikti për motive të dobëta, ai ka vrarë më armë zjarri kallashnikov, kunatin dhe motrën e tij, përkatësisht shtetasit A. Gj. dhe M. Gj..” – thuhet në njoftimin e Policisë.
Gjovalin Lesi është kapur në Matera, pas shkëmbimit të informacioneve të siguruara nga Departamenti i Policisë Kriminale në Shqipëri me Policinë e Materas, shkëmbim i kryer me koordinimin e Zyrës së Interforcës Italiane, Zyrës së Ekspertëve Italianë të Sigurisë, në Shqipëri, dhe Shërbimit për Bashkëpunim Ndërkombëtar Policor – Divizioni i 2-të, Romë.
Policia e Shtetit njofton se po vijon bashkëpunimi për të kryer ekstradimin e 55-vjeçarit, në Shqipëri.
