Policia e Koçës ka dalë me një komunikatë zyrtare për të njoftuar qytetarët në lidhje me mbylljen për dy ditë të pikës doganore në Kapshticë, për shkak të protestës nga ana e sindikalistëve grekë.
Bëhet me dije se dogana do të qëndrojë e mbyllur që prej orës 05:30 të datës 2 prill deri në orën 05:30 të datës 4 prill, ku nuk do të lejohet qarkullimi i automjeteve, autobusëve dhe kamionëve.
Sipas Policisë së Korçës, do të lejohen të qarkullojnë vetëm këmbësorët, pa bagazhe, dhe automjetet që do kenë emergjenca shëndetësore.
Ditën e djeshme, për të njëjtat data u njoftua dhe mbyllja e tre pikave të tjera doganore me Greqinë, në Kakavijë, Tre Urat dhe Qafë Botë.
Njoftimi:
Në vijim të informacionit të dhënë nga Policia e Shtetit, ditën e djeshme, ju informojmë se, Policia Greke ka njoftuar Stacionin e Policisë Kufitare Kapshticë, se nga data 02.04.2024, prej orës 05:30, deri më datë 04.04.2024, në orën 05:30, pika doganore greke në Kapshticë, do të jetë e mbyllur për shkak të protestës nga sindikatat greke.
Nuk do të lejohet qarkullimi i automjeteve, autobusëve dhe kamionëve.
Do të lejohen të qarkullojnë vetëm këmbësorët, pa bagazhe, dhe automjetet që do kenë emergjenca shëndetësore.
Policia e Shtetit është në kontakt të vazhdueshëm me autoritetet policore greke dhe do të ketë njoftime të tjera në kohën e duhur, për çdo ndryshim.
