Këshilli Bashkiak i Himarës ka komanduar Blerina Balajn për drejtimin e bashkisë së Himarës. Nga 21 anëtarë, 15 prej tyre kanë votuar pro. Bala u propozua për kryetare nga Partia Socialiste.
Komandimi i saj vjen pas dorëheqjes kryetarit socialist në detyrë së Jorgo Goro, i cili u arrestua disa ditë më parë për shpërdorim detyre, me urdhër të SPAK.
Në burg ndodhet edhe Fredi Beleri, kryetari i zgjedhur i bashkisë në lokalet e 14 majit, i arrestuar dy ditë para zgjedhjeve dhe i dënuar për korrupsion zgjedhor nga GJKKO.
Mbledhja e Këshillit Bashkiak u shoqërua me tensione. Qytetarë dhe mbështetës të Fredi Belerit u futën në ambientet e brendshme të bashkisë Himarë, ku u përplasën edhe me policinë. Ata kërkuan largimin e prefektit të Vlorës, Vangjel Tavo dhe Sekretarit të Përgjithshëm të PS, Blendi Klosi. Në momentin kur Tavo është larguar, një mbështetës i Fredi Belerit e ka pështyrë në fytyrë atë dhe më pas kanë debatuar edhe me fjalë.
Pas tensioneve të krijuara, drejtuesi politik Blendi Klosi dhe prefekti i Qarkut të Vlorës u larguan.
Mbledhja u shty për në orën 12:00, për tu zhvilluar me dyer të mbyllura, teksa u mor edhe vendimi për komandimin në krye të Bashkisë Himarë të nënkryetares Blerina Balaj.
Kryetari i Këshillit Bashkiak të Himarës, Dhimitër Kapaj tha për mediat se opozita në këshillin bashkiak bashkoi votat me mazhorancën për zgjedhjen e Balajt në krye të bashkisë.
“U zgjodh Blerina Balaj, nënkryetare e Bashkisë Himarë. Ligji thotë që një nga nënkryetarët marrin drejtimin. Grupi i PS propozoi Blerina Balaj. Më 15 vota u zgjodh. Ne 9 vota kemi. Pjesa tjetër janë Bashkë Fitojmë, përveç anëtarëve të PS, u bashkuan edhe pjesa tjetër”, tha ai.
Lexo edhe:
U pështy në fytyrë, reagon Tavo. Tregon dhe nëse do të garojë për kryebashkiak
Bala në krye të bashkisë Himarë, reagon Rama
