Dy persona janë arrestuar nga policia e Elbasanit, pasi akuzohen se kanë futur dhe mbajtur për disa momente në një automjet një 68-vjeçar, pa dëshirën e tij. Ka qenë ky i fundit që ka bërë kallëzim në polici.
“Pas kallëzimit të një shtetasi 68 vjeç, se për motive të dobëta, 2 shtetas i kishin hequr lirinë, duke e mbajtur për disa minuta, kundër vullnetit të tij, në një automjet, si dhe se ishte kanosur me qëllim dhënien e një shume parash, shërbimet e Komisariatit të Policisë Elbasan organizuan punën për kapjen dhe nxjerrjen përpara përgjegjësisë penale të 2 autorëve”, njoftoi policia.
Në pranga u vunë: 57-vjeçari Resmi Karaj, banues në Peqin dhe 47-vjeçarja Pranvera Sefa, banuese në Belsh. Ata akuzohen për veprat penale “Heqja e paligjshme e lirisë”, kryer në bashkëpunim dhe “Shtrëngimi me anë të kanosjes ose dhunës për dhënien e pasurisë”.
Gjithashtu, në cilësinë e provës materiale u sekuestruan automjeti ku u mbajt 68-vjeçari dhe 3 celularë.
