Një ngjarje makabër ka ndodhur në Brazil, ku një 39-vjeçar ka vrarë të bijën pas një debati dhe më pas ka paguar një person të pastrehë për vetëm 2 dollarë për të djegur trupin. Në këtë mënyrë ai donte që të fshinte gjurmët e krimit të tmerrshëm.
“Daily Mail” shkruan se autori i ngjarjes është Wellington da Silva, i cili është arrestuar të mërkurën dhe ka rrëfyer se kishte vrarë të bijën, Reisa da Silva, në banesën në Sao Paulo.
Gjithashtu është publikuar edhe një video e marrë nga kamera e sigurisë, të cila ishte e vendosur jashtë banesës së 39-vjeçarit. Në pamjet në fjalë shihet momenti kur ai po vendoste trupin e pajetë të 18-vjeçares në ashenosr.
Wellington Da Silva u tha autoriteteve se ai dhe e bija po pinin alkool së bashku në banesë, por papritmas filluan të grindeshin për ndarjen e tij nga e ëma disa muaj më parë.
39-vjeçari tha se u tërbua sepse e reja këmbënguli të mbështeste nënën e saj dhe e mbyti atë.
Sipas policisë së Sao Paulos, 39-vjeçari fjeti gjumë me kufomën e vajzës së tij në banesë dhe vendosi ta asgjësonte kufomën një ditë më pas, mbrëmjen e së hënës.
Më pas, dyshohet se iu afrua një burri të pastrehë dhe i kërkoi të blinte etanol nga një pikë karburanti aty pranë dhe i vuri zjarrin trupit të saj.
“Ai na tha se i kishte paguar 2 dollarë për ta bërë këtë”, deklaroi një zëdhënës i policisë lokale.
Ndërkohë nëna e Reisës e denoncoi zhdukjen e saj të hënën dhe trupi i djegur i 18-vjeçares u gjet të martën në trotuar nga kalimtarët.
Autoritetet kanë nisur kërkimet për gjetjen e personit të pastrehë dhe po shikojnë pamjet nga kamerat e sigurisë në zonë për të konfirmuar pretendimet e 39-vjeçarit.
