Në lidhje me dosjen “5D”, SPAK lëshoi urdhër-arresti veç ish-drejtorit të IMT-së Mariglen Qato dhe ish-drejtorit të UKT-së, Redi Molla, edhe për Taulant Tushën, ish-drejtor i Punëve Publike në Bashkinë e Tiranës.
Ndaj tij është masë e dytë sigurie “arrest me burg”, pasi ai ndodhet në qeli në lidhje me aferën e inceneratorit të Tiranës.
Në lidhje me dosjen “5D”, Tushe akuzohet për veprën penale “Shkelja e barazisë së pjesëmarrësve në tendera apo ankande publike”, të kryer në bashkëpunim, e kryer dy herë.
“Janë krijuar dyshime të arsyeshme se shtetasi Taulant Tusha në cilësinë e Drejtorit të Përgjithshëm të Drejtorisë së Planifikimit të Punëve Publike dhe të anëtarit të Komisionit të Vlerësimit të Ofertave, si dhe shtetasit Enton Punavija, Julian Zanaj dhe Albano Janku në cilësinë anëtarit të Komisionit të Vlerësimit të Ofertave, në disa procedua prokurimi, e kanë favorizuar dhe i kanë krijuar këtij subjekti tregtar avantazhe dhe privilegje të padrejta në raport me operatorët e tjerë ekonomikë që kanë marrë pjesë në procedurat e prokurimit, duke e shpallur fituese të procedurës së prokurimit në mënyrë të parregullt dhe në shkelje të rregullave të prokurimit publik. Ekzistojnë dyshme të bazuara se shtetasi Taulant Tusha ka pasur dijeni në lidhje me ortakët e vërtetë të shoqërisë “5D Konstruksion” sh.p.k dhe ka favorizuar këtë shoqëri tregtare duke ditur se cilët persona kanë qënë zotëruesit indirekt të aksioneve të shoqërisë.” – thuhej në njoftimin e SPAK.
Kujtojmë se urdhër-arrestet e sotme u lëshuan në lidhje me tenderat e Bashkisë së Tiranës dhe institucionet vartëse të saj, të fituara nga kompania “5D Konstruksion” sh.p.k., e cila ka patur dhe emrat “Igor Elektrik” sh.p.k dhe “V.A.S Konstruksion” sh.p.k.
Nga hetimet ka rezultuar se Redi Molla dhe Mariglen Qato janë ortakët e vërtetë dhe pronarët “de facto” të shoqërisë, të cilët e kanë zotëruar këtë shoqëri tregtare në mënyrë indirekte, duke përdorur persona të tjerë, shtetasit Eduard Meta, Muhamet Petriti dhe Nestor Muhametllari, si ortakë fiktiv në aktet e rregjistrimit dhe funksionimit të shoqërisë, me të cilët ortakët e vërtetë të shoqërisë kanë pasur lidhje shoqërore dhe lidhje miqësore.
