Teksa kanë kaluar tre vjet nga ekzekutimi i Pjerin Xhuvanit në Elbasan, i njohur ndryshe si “Pipi”, tre ekspertë sot kanë shkuar sërish në vendin e krimit për të rindërtuar skenën e vrasjes. Ish-drejtori i spitalit Psikiatrit, Pjerin Xhuvani u qëllua me armë nga Arbër Paplekaj, në 25 prill të vitit 2021.
Sipas ekspertëve, nga arma e ish-efektivit të RENEA-s, i dënuar si autor i vrasjes, është qëlluar 7 herë. Gjithashtu në vendngjarje janë gjetur më shumë gëzhoja.
Ekspertët në vendngjarje, konkretisht Arjan Hanko, pranë Institutit të Policisë Shkencore, Artan Rexhepi dhe Shpëtim Buda, ekspertë të pavarur, do të përcaktojnë drejtimin e qitjes së armëve ditën e krimit, distancën dhe pozicionet nga është qëlluar kur u vra Pjerin Xhuvanit.
Prokuroria ka vënë 9 prillin si afat përfundimtar kur ekspertët do të paraqesin konkluzionet nga eksperimenti hetimor.
