“Rindërtimi në Tiranë do mbarojë kur të vijë përfundimi i mandatit të Kryebashkiakut Veliaj!”, kështu shprehet përmes një postimi në rrjetet sociale, këshilltari për Çështjet Ekonomike në PD dhe njëkohësisht Nënkryetar i Këshillit Bashkiak të Tiranës, Dorjan Teliti.
Ai ka reaguar ndaj zvarritjes disa vjeçare të procesit të rindërtimit në bashkinë e Kryeqytetit, duke kujtuar premtimin se ky process do të përfundonte në 2021.
Postimi nga Dorian Teliti
Rindërtimi në Tiranë do mbarojë kur të vijë përfundimi i mandatit të Kryebashkiakut Veliaj!
Kjo konfirmohet nga vetë Kryebashkiaku i Tiranës, i cili ka sjellë për miratim në Këshillin Bashkiak të Tiranës rishikimin e Buxhetit 2024 dhe PBA-në 2024-2026, ku konstatohet mjaft qartë, e zeza në të bardhë, fakti që financimi i rindërtimit si në zonën e 5 majit ashtu edhe në zonën e Kombinatit do të vazhdojë të paktën edhe për 2 vitet e ardhshme.
Premtimi ishte: Brenda vitit 2021 do rindërtohej cdo gjë e shkatërruar nga termeti i tmerrshëm i 26 nëntorit 2019.
Ndryshe thanë e ndryshe bënë.
Fakt 1: Deri më sot janë alokuar pothuajse 1 miliardë euro për rindërtimin, ku pjesën më të madhe e ka përfituar Tirana, por njerëzit vazhdojnë të jenë ende pa shtëpi.
Fakti 2: Procesi i rindërtimit është karakterizuar nga mungesë transparence, përdorim jo-eficient i parasë publike, procedura prokurimi shpeshherë pa garë, monitorim i cekët dhe mungesë informacioni mbi ecurinë e këtij procesi, kosto të larta sociale si pasojë e zvarritjes së procesit, etj.
⁉️Natyrshem lindin pyetjet/dyshimet: Pse dhe a është e qëllimshme kjo zvarritje e rindërtimit të shtëpive të atyre që sot shtëpi nuk kanë?
Pse për të ndërtuar dy komplekse me godina pak katëshe u dashkan 8 vite, ndërkohë që komplekse me kulla 30-40 apo 50 katëshe na mbijnë nga hici dhe përfundojnë punimet brenda 2-3 viteve?
Ndaj, i bëj thirrje Kryetarit të Bashkisë që mjaft e lënë pas dore këtë proces jetik, por ta konsiderojnë prioritet mbi prioritetet dhe ta përmbyllin punën brenda 2024, mundësitë si financiare ashtu edhe teknike e mundësojnë këtë gjë.
Asgjë nuk e pengon, duhet thjesht vullnet!
