Gjykata italiane ka rrëzuar kërkesat për gjykim të shkurtuar dhe vlerësim psikiatrik për Taulant Malajn, shqiptarin që vrau vajzën e tij 16-vjeçare Jessica, fqinjin Massimo De Santis dhe tentoi të vriste të shoqen, Teftën.
Ngjarja ndodhi në Itali më 7 maj të vitit të kaluar dhe shkak është bërë xhelozia e Malajt, i cili dyshohet se e shoqa e tradhëtonte me fqinjin De Santis.
Avokati i Tefta Malajt, në seancën e mbajtur këtë të diel, tha se procesi gjyqësor për këtë rast do të jetë i gjatë dhe kompleks.
“Duam të evidentojmë sjelljen e të pandehurit para dhe pas vrasjes në aspekte të ndryshme që lidhen më vonë me dënimin. Ne do të vazhdojmë në mënyrë konkrete me objektivat tona të qarta duke vlerësuar ato që dalin nga hetimi paraprak”, tha ai.
Siç shkruajnë mediat në proces do të shfaqen disa video, të xhiruara nga vetë Malaj pas masakrës. Këto imazhe janë të paedituara dhe tronditëse. Sakaq është njoftuar se seanca e radhës ndaj Malajt do të mbahet në muajin Maj./Imeddiato.net
Dinamika e ngjarjes:
45-vjeçari Taulant Malaj, me profesion bukëpjekës dyshonte se bashkëshortja e tradhëtonte me fqinjin italian si Massimo De Santis, 51 vjeç. Për këtë arsye, dyshja ishin konfliktuar shumë herë, por sherri kulmoi kur shqiptari i zuri pritë në shkallë italianit. Ai e qëlloi 51-vjeçarin me një thikë kuzhine dhe e la të mbuluar në gjak në shkallë ku dhe ndërroi jetë.
Më pas, me të njëjtën thikë të lyer me gjak, u fut në banesë ku u konfliktua me të shoqen. Dyshja nisën të konfliktoheshin fizikisht. Ai qëlloi gruan me thikë e më pas nisi të qëllonte të bijën, vetëm 16 vjeçe, për të cilën gjithashtu thotë se është ngacmuar nga italiani.
Adoleshentja ndërroi jetë në vend, ndërsa gruaja u transportua në spital, dhe aktualisht ndodhet rrezikut për jetën. Taulant Malaj i filmoi të tre dhe videon me trupat e tyre të mbuluar në gjak ua dërgoi të afërmve. Në sfond dëgjohet të shante të shoqen dhe të thoshte se do të vijonte t’i masakronte me thikë, pasi policia nuk kishte mbërritur ende në vendngjarje.
