Katër të vdekur dhe pesë të plagosur është bilanci i aksidentit tragjik që ndodhi mbrëmjen e kësaj të diele në “bypassin” e Tepelenës.
Ngjarja mësohet se ka ndodhur poshtë kalasë së qytetit që është pjesë e aksit nacional Tepelenë-Gjirokastër, ku tre makina janë përplasur me njëra tjetrën.
Ka qënë njëra nga automjetet tip “Mercedez Benz” shoferi i të cilës ka humbur fillimisht kontrollin dhe si pasojë është përplasur me dy automjete të tjera tip “Toyota” dhe “BMW” që qarkullonin në drejtim të kundërt. Siç mund të shihet edhe në pamjet e mëposhtme përplasja ka qënë e fortë dhe tre makinat janë shkatërruar. Është dashur ndërhyrja e zjarrfikësve për të nxjerrë trupat nga automjetet.
Nga përplasja e tre mjeteve kanë humbur jetën shtetasit, Lavdosh dhe Lefteri Begaj, burrë e grua dhe e afërmja e tyre Afërdita Begaj 85 vjeçe, që ndodheshin në makinën tip “Toyota”.
Gjithashtu ka humbur jetën shtetasi Riza Rrapa banues në Luftinjë, i cili po udhëtonte me mjetin tip Mercedez Benz, dhe dyshohet se ka qënë shkaktar për aksidentin.
Sakaq të plagosur kanë mbetur Lavdie Meta dhe Jani Meta.
Në njoftimin paraprak policia sqaroi se dy të plagosurit, Meta, janë dërguar për ndihmë mjekësore në Spitalin Rajonal Gjirokastër, por mësohet se gjendja e tyre është përkeqësuar dhe janë nisur drejt Spitalit të Traumës, për ndihmë më të specializuar mjekësore.
“Rreth orës 19:00, në aksin rrugor Tepelenë-Memaliaj, automjeti tip “Benz” me drejtues shtetasin R. R., 42 vjeç, banues në Luftinjë, është përplasur me automjeti tip “Toyota” me drejtues shtetasin L. B., 62 vjeç, banues në Memaliaj.
Si pasojë e përplasjes së automjeteve kanë humbur jetën shtetasit R. R. dhe L. B., si dhe 2 pasagjeret që ndodheshin në automjetin tip “Toyota”, shtetaset L. B., rreth 57 vjeçe (bashkëshortja e shtetasit L. B.) dhe A. B., rreth 85 vjeçe.
Gjithashtu janë dëmtuar shtetasit L. M. dhe J. M., të cilët po marrin ndihmë mjekësore në Spitalin Rajonal Gjirokastër”,- thuhet në njoftimin e bluve.
Gjithashtu në një informacion shtesë, policia bën me dije se janë plagosur lehtë edhe tre shtetas të tjerë që po udhëtonin në automjetin tip “BMW”.
“Në aksident është përfshirë edhe automjeti tip “BMV” me drejtues shtetasin E. P., banues në Gjirokastër, që qarkullonte pas automjetit tip “Toyota”.
Shtetasi E. P. dhe 2 pasagjerët në automjetin e tij janë dëmtuar lehtë”,- thuhet në njoftimin shtesë të bluve.
Sipas verifikimeve të para nga ana e Policisë Rrugore, bëhet e ditur se shkaku i aksidentit ka qenë humbja e kontrollit të shoferit të Benzit, por edhe lagështia në rrugë për shkak të reshjeve të shiut.
Grupi hetimor ndodhet në vendngjarje dhe po punon për zbardhjen e plotë të rastit.
