Konferenca e Kryetarëve e parashikuar të mblidhej këtë të mërkurën në orën 13:30 në ambientin e Kryesisë së Kuvendit, është shtyrë për një moment tjetër.
Ditën e sotme priteshin të zyrtarizoheshin pikat e marrëveshjes së rëna në parim ditën e djeshme. Burime për mediat bëjnë me dije se nuk është gjetur dakordësia mes palëve për objektin e komisioneve hetimore parlamentare.
Në një prononcim për gazetarët, teksa po hynte në selinë blu, kreu i grupit parlamentar të PD-së, Gazment Bardhi nuk pranoi të jepte arsyet e shtyrjes së mbledhjes.
“Duhet të pyesni Kuvendin” – tha shkurtimisht ai për gazetarët, teksa nuk iu përgjigj as pyetjes nëse “A kanë dështuar negociatat?”.
Kujtojmë se ditën e djeshme, opozita braktisi bojkotin pas 5 muajsh tensione dhe mori pjesë në Konferencën e Kryetarëve, ku në fokus të diskutimit ishin negociatat mes palëve për të sjellë normalizimin në Kuvend.
Ditën e djeshme mazhoranca pranoi në parim disa prej kërkesave të opozitës, ku një prej tyre ishte edhe ngritja e dy komisioneve hetimore parlamentare. Ai për koncesionet në Shëndetësi dhe për ndërhyrjen në të dhënat personale të sistemit TIMS.
Kështu, mazhoranca tërhiqet nga vendimet e datës 12 Tetor 2023 për rrëzimin e komisionit hetimor për kontratat koncesionare në shëndetësi dhe për komisionin hetimor për ndërhyjen e paligjshme në sistemin TIMS.
Një tjetër pikë për të cilën palët u dakordësuan në parim ishte edhe ngritja e “Nënkomisioneve për Reformat”, për ligjet që kërkojnë shumicë të cilësuar votash. “Nënkomision për Reformat” do të përbëhen nga 4 anëtarë (dy cakton Çuçi dhe dy cakton Bardhi). Në këtë rast, grupimi i Lulzim Bashës, del “jashtë loje”.
Nënkomisioni është përgjegjës për diskutimin/shqyrtimin e paketave ligjore, reformave dhe ligjeve që kërkojnë shumicë të cilësuar apo ligjeve që kërkojnë gjithëpërfshirës, përfshirë ligjet që janë të nevojshme për procesin e integrimit europian. Komisioni merr vendimet me konsensusin e të gjithë anëtarëve (veto) dhe më pas i kalon aktet e dakordësuara për shqyrtim/miratim në seancë plenare.
Ndërkohë, nuk ka patur diskutime në lidhje me bashkëkryetarin e komisionit të posaçëm të reformës zgjedhore, pasi i përfundon mandati më 21 Mars.
Burime për mediat bënë me dije se Gazment Bardhi dhe Klotilda Bushka ishin ligjvënësit e përzgjedhur për t’u marrë me diskutimet për shqyrtimin e objektit dhe ngritjen e këtyre komisioneve hetimore parlamentare të dakordësuar mes palëve, por siç duket diskutimet nuk kanë shkuar ashtu siç duhet.
