Nga Boldnews.al
Ministria e Infrastrukturës dhe Energjisë ka dhënë një tjetër “ndihmë” për koncesionarët e Triportit në Vlorë. Kjo është hera e dytë që ministrja Balluku firmos tender pas koncesionit.
Një angazhim i drejtpërdrejtë i zv.kryeministres në këtë procedurë, teksa në atë zonë qëndrojnë “të fjetur” edhe dy anijet gjenerator. Duket se, në zonën e Triportit, Balluku ka interesa të mëdha. Nga njëra anë “Tigrat” gjeneratorë, nga ana tjetër TEC-i i Triportit dhe tashmë edhe koncesioni i portit të peshkimit.
Dhe, nëse do ti mbledhim të gjitha fondet bashkë, shuma shkon deri në 1 miliardë euro. Por, gjatë kësaj kohe, bëhen vazhdimisht tendera për blerje nafte, për përshtatjen e “Tigrave”, për mirëmbajtjen e TEC-it dhe për “ndihmat” e koncesionarëve!
Disa ditë më parë, Ministria e Infrastrukturës ka shpallur në Agjencinë e Prokurimit Publik një tender të ri. Objekti i kësaj procedure është “shërbime inxhinierike të pavarura për zbatimin e kontratës koncesionare për projektimin, ndërtimin dhe mirëmbajtjen e ‘Portit të Integruar’ në Triport Vlorë”. Mësohet se fondi limit i kësaj procedure është 67.655.315 lekë. Duke i shtuar edhe TVSH-në shuma shkon në mbi 700 mijë euro. Mësohet se bëhet fjalë për mbikëqyrje të punës së ndërtimit.
Por, nëse do të bëjmë një kërkim të thjeshtë, rezulton se procedura është e njëjtë me atë të hapur 1 vit më parë. Në atë kohë, BoldNews.al ka publikuar dokumentet e procedurës së atëhershme; “shërbime inxhinierike të pavarura për zbatimin e kontratës koncesionare për projektimin, ndërtimin dhe mirëmbajtjen e ‘Portit të Integruar’ në Triport Vlorë”. Para të hedhura në një punë që i është dhënë privatit, madje procedurë prej dhjetëra miliona eurosh. Fondi limit i procedurës së vitit 2023 ishte 70.554.393 lekë, ndërsa shuma në vitin 2024 është ulur me 3 milionë lekë!
Balluku, tender 700 mijë euro për të ndihmuar koncesionarët e Triportit në Vlorë
Raportimi BoldNews.al për tenderin e Ministrisë së Infrastrukturës në vitin 2023
Në vitin 2023, redaksia e BoldNews.al publikoi dokumentet e një tenderi të hapur nga ministrja Belinda Balluku, në tentativë për të ndihmuar koncesionarët e Portit të Ri në Vlorë. “Tenderi vjen në një mori vendimesh të pinjolles së familjes Balluku, i cili fillon me procedurën e zhvendosjes së portit aktual në qendër të Vlorë për ta degdisur në portin e peshkimit. Ky vendim i hapi rrugë ndërtimit të Marinës së Vlorës, ku po ndërtohen pallate dhe hotele shumë katëshe në territorin e këtij porti. Madje, ekskavatorë kanë filluar punën në atë pronë, dikur shtetërore për të ndërtuar ato kulla. Ndërkohë, nga ana tjetër, një mori vendimesh kanë sjellë që porti aktual të zhvendoset në zonën e Triportit, teksa ndërtimi i atij porti është dhënë me koncesion nga Ministria e Infrastrukturës. Vendimmarrje që kanë shtuar kostot në buxhetin e shtetit. Madje, edhe procedura e fundit”, thuhej në artikullin e redaksisë sonë.
Koncesioni i Triportit është dhënë në vitin 2021. BoldNews.al ka raportuar edhe më herët për këtë procedurë, e cila ka pasur hije të mëdha dyshimi, pasi firmat fituese ofruan 1.4 milionë euro më shumë sesa oferta më e ulët. Në dokumente thuhet se kohëzgjatja e kontratës së koncesionit/PPP është 10 vjet. Njoftojmë se, kanë qenë pjesëmarrës në procedurë ofertuesit me vlerat përkatëse të ofruara BOE ‘AGBES CONSTRUKSION’, ‘BESTA’, ‘Premium Construction & Maintenance’, ‘ITE. GRUP’ dhe ‘ARKONSTUDIO’.
Këto firma kanë pasur një ofertë me vlerë totale të ndërtimit dhe të mirëmbajtjes prej 40.000.000 euro. Ofertë ka paraqitur shoqëria ‘ED KONSTRUKSION’, me vlerë totale të ndërtimit dhe të mirëmbajtjes prej 38.650.000 euro. Por, kjo shoqëri është s’kualifikuar dhe fitues është shpallur oferta me rreth 1.4 milionë euro më shumë. Si në të gjitha këto koncesione apo tenderë të mëdhenj, fituesit shpallen ata që ofrojnë më shumë!”
