Prokurorja e Elbasanit, Pranvera Stafa është shkarkuar nga detyra. Vendimi u njoftua këtë të premte nga Komisioni i Pavarur i Kualifikimit.
Trupa gjykuese që kreu procesin e rivlerësimit të Stafës drejtohej nga Etleda Çiftja, me relatore Brunilda Bekteshin dhe anëtar Lulzim Hamitajn.
Seanca dëgjimore për prokuroren e Elbasanit, e planifikuar për t’u zhvilluar të hënën e 4 marsit në Komisionin e Pavarur të Kualifikimit, u shty me kërkesë të vetë subjektit të rivlerësimit me argumentin se përfaqësuesi ligjor i zgjedhur prej saj nuk kishte mundur të ishte i pranishëm.
Gjatë seancës dëgjimore zhvilluar më 6 mars, komisioni konstatoi pamundësi financiare të prokurores së Elbasanit, për krijimin e disa depozitave dhe probleme në disa çështje të hetuara prej saj. Vetë Stafa nuk ishte prezente në seancë, ndërsa u përfaqësua me avokat, i cili deklaroi se kishin kundërshtuar barrat e provës dhe kërkoi konfirmimin e saj në detyrë.
Pranvera Stafa e ka filluar karrierën në sistemin e drejtësisë në vitin 1989. Ajo punon prej më shumë se dy dekadash si prokurore pranë Prokurorisë së Elbasanit.
