Kolegji i Posaçëm i Apelimit, KPA shpalli të mërkurën më 23 korrik vendimmarrjen për lënien në fuqi të vendimit të Komisionit, për shkarkimin e ish-gjyqtares së Gjykatës së Lartë, Majlinda Andrea, e cila nuk e ushtron funksionin prej vitit 2016, kur u akuzua për korrupsion dhe u dënua një vit më vonë me 4 vjet burg, por që u konvertua në shërbim prove.
Komisioni i Pavarur i Kualifikimit, KPK konstatoi se institucionet e drejtësisë që ushtrojnë veprimtarinë e tyre për hetimin dhe procedimin disiplinor të magjistratëve, për gjashtë vjet radhazi nuk kishin ushtruar kompetencat e tyre për t’i hequr Andreas statusin e magjistratit dhe vendimarrja për ta shkarkuar u konsiderua si një mënyrë për të zgjidhur përfundimisht statusin e saj të magjistratit.
Por, Komisioneri Publik, Florian Ballhysa e cilësoi të gabuar arsyetimin e Komisionit. Ai vlerësoi se ushtrimi nga ana e Komisionit i kompetencës kushtetuese së kryerjes së procesit të rivlerësimit duke sjellë shkarkimin e magjistratit të dënuar, nuk mund dhe nuk duhet të zëvendësojë ardhjen e pasojës, për shkak të mosveprimit të Inspektorit të Lartë të Drejtësisë, ILD-së dhe Këshillit të Lartë Gjyqësor, KLGJ-së, të cilët Kushtetuta i detyron të veprojnë në rastin konkret.
Edhe drejtuesi i SPAK, Altin Dumani i qëndroi ankimit dhe kërkoi që procedura e vetingut të Andreas të deklarohej e përfunduar pa një vendim përfundimtar. Gjatë shqyrtimit në Kolegj, u konstatua se ILD dhe KLGJ ishin ende në kushtet e mosveprimit lidhur me çështjen e ish-gjyqtares Andrea.
Në përfundim të gjykimit, kërkesa e Komisionerit dhe e drejtuesit të SPAK u gjet e pabazuar nga Kolegji që vendosi lënien në fuqi të vendimmarrjes së Komisionit./BIRN
