Janë zbuluar detaje të reja për operacionin “Knock Out 6” që çoi paraditen e djeshme në zbulimin e një baze armatimesh në fshatin Babicë e Madhe të Vlorës.
Brenda banesës ndodheshin vetëm familjarët e Luçiano Derajt. Në katin e parë jetonin gjyshërit, njerka dhe babai i të riut, një ish-ushtarak që momentalisht punon si taksixhi.
Policia e Vlorës ka marrë në pyetje Luçiano (Albano) Derajn, i cili u arrestua të enjten pasi në tavanin e shtëpisë në Babicë iu gjet arsenal armësh. Ai nuk është treguar bashkëpunues dhe nuk ka dhënë detaje për origjinën e armëve dhe me çfarë grupesh kriminale ka lidhje.
Deraj dyshohet se i përket një grupi kriminal, i cili bashkëpunonte me të ndjerin Edison Harizaj (i njohur si Faqedjeguri) dhe një pjesë e tyre figurojnë të skeduar në dosjen e të zhdukurve në Vlorë.
Armët janë dërguar në Laboratorin e Policisë Shkencore për ekspertizë balistike për ekzaminim pasi dyshohet se disa prej tyre të jenë përdorur në disa ngjarje kriminale të kohëve të fundit.
Madje, dyshohet se snajperat e gjetur, njëri prej tyre, mund të jetë përdorur në ekzekutimin e Gëzim Sinomatit, ngjarje kjo e muajit janar të këtij viti.
