Një operacion i zhvilluar nga policia në zonën e Fushë-Krujë një ditë më parë nuk arriti të finalizohej me arrestimin e të shumëkërkuarit Ylli Zalla, i cili ka mundur t’i shpëtojë ndërhyrjes së uniformave blu, pavarësisht se ishte lokalizuar.
Specialistët për Hetimin e Krimeve në Komisariatin e Policisë Krujë ushtruan kontroll në banesën e tij, por Zalla nuk u gjet në vendngjarje, duke u larguar para mbërritjes së policisë.
Ndërkohë, ditën e sotme raportohet se gjatë kontrollit të ushtruar në oborrin e banesës, efektivët zbuluan dhe sekuestruan një sasi municioni luftarak, si dhe 14 fitila zjarrpërcjellës, të cilat u morën në cilësinë e provës materiale.
Zalla ishte shpallur në kërkim që prej muajit nëntor për vepra penale që lidhen me armëmbajtjen pa leje. Policia kishte arritur të zbulonte vendndodhjen e tij në zonën e Zallës, në Fushë-Krujë, ku edhe u ndërmor operacioni, por ai arriti të largohej në momentet e fundit.
Ylli Zalla nuk është një emër i panjohur për autoritetet. Rreth 12 vite më parë ai është arrestuar për prodhim të bombave artizanale dhe është dyshuar gjithashtu për përfshirje në prodhim dhe shitje të lëndëve narkotike. Në atë periudhë, sipas burimeve, ai është hetuar edhe për lidhje të mundshme me ISIS, në kuadër të dyshimeve për rekrutimin e shtetasve shqiptarë për xhihad.
Po ashtu, vite më parë, Zalla është përfshirë në një rast kërcënimi me jetë ndaj pronarit të një kompanie çimentoje në Fushë-Krujë.
Arsenali i armëve në banesën e tij në zonën e Fushë-Krujës është zbuluar pas atentatit në Rinas ku u vra Gilmando Dani dhe Muci Shaljani (Sheqeri).
