Policia e Krujës ka zbuluar një arsenal armësh dhe lëndësh narkotike në një banesë në fshatin Zall, Fushë Krujë.
Gjatë kontrollit të territorit, pranë banesës së shtetasit Ylli Zalla, u sekuestruan armë zjarri, municion luftarak, lëndë shpërthyese dhe drogë, ndërsa 49-vjeçari është shpallur në kërkim nga policia i dyshuar si posedues i arsenalit dhe lëndës narkotike.
Sipas njoftimit zyrtar, janë gjetur 24 kallëpë tritoli, 11 granata dore sulmuese, sasi lëndësh plasëse gati për shpërthim të montuara me kapsolla detonatore, fitila zjarrpërcjellës, 5 ndezës granatash, 74 kapsolla detonatore, 19 mbështjellje sferike C4, 11 kallëpë dinamiti, si dhe 27 djegore.
Përveç tyre, policia ka sekuestruar 3 armë zjarri, krehra dhe pjesë armësh, 2 silenciatorë, rreth 9000 fishekë të kalibrave të ndryshëm, 6 kilogramë lëndë narkotike Cannabis Sativa, uniforma policie dhe sende të tjera të kundërligjshme.
