Partia Demokratike ka depozituar këtë të mërkurë në Gjykatën Kushtetuese një padi ku kërkon shfuqizimin tek ligji “Për Tatimin Mbi Të Ardhurat”, nenin për profesionet e lira.
Padia është firmosur nga 37 deputetë, kryesisht të Partisë Demokratike, teksa u janë bashkuar edhe deputetë nga Partia e Lirisë si Petrit Vasili apo Erisa Xhixho.
Mes deputetëve që kanë firmosur është dhe Jorida Tabaku, një tjetër akt, që tregon se ajo është më pranë grupit parlamentar të shumicës në PD, të dyshes Berisha-Bardhi. Madje Tabaku, ka qenë dhe ajo që është prononcuar për mediat nga dera e Gjykatës Kushtetuese, e cila tha se shpreson që gjykata duhet të ngrihet në nivelin që i takon, dhe të mos caktoj precedentë që janë të rrezikshme për besueshmërinë e saj.
Tabaku theksoi më tej se shpresojnë që Kushtetuesja “të jap një vendim në të mirë publike, që në këtë rast shkon me shtresën e mesme”.
“Shpresoj shumë që Gjykatat Kushtetuese të ngrihet në nivelin që i takon, dhe të mos caktoj precedentë që janë të rrezikshme për besueshmërinë e saj, e të jap një vendim në të mirë publike, që në këtë rast shkon me shtresën e mesme. I bëj thirrje kujtdo që do t’i bashkohet kësaj padie si palë, të jap mendimin e vet, nga institucioni i avokatit të popullit, e institucionet e tjera, që duan t’i bashkohen kësaj nisme të grupit parlamentar të PD. Ne besojmë tek forca që kanë institucionet dhe tek ligji, shpresojmë që Gjykata Kushtetuese të mos zhgënjejë.” – tha Tabaku.
Ndërkohë në fotot e mëposhtme është dokumenti me firmat e deputetëve që kanë depozituar padinë.
