Partia Demokratike paralajmëron kallëzim penal në SPAK për kryebashkiakun e Tiranës Erion Veliaj, lidhur me pamjet skandaloze të publikuara një ditë më parë në media, të varrezave murale të Tufinës.
“Është e papranueshme dhe e patolerueshme të shohësh imazhet e disa qeseve mbeturinash, që mbështjellin kocka njerëzish me dhe pa emër, si të jenë pamjet e tmerrshme të ushtarëve të vrarë në luftë, hedhur kapicë nga kundërshtari në front. Kjo barbari, ky dhunim monstruoz i dinjitetit njerëzor, e çon Bashkinë Tiranë në një tjetër podium, nga institucioni më i korruptuar në Europë, tashmë në institucionin më barbar të Europës”, komentoi pamjet e transmetuara anëtari i Kryesisë së PD, Belind Këlliçi.
Më tej, shtoi se gjendja në Tufinë tregon sipas tij një “krim makabër, mohimi i të cilit paturpësisht shton neverinë ndaj mungesës së humanizmit dhe shkeljes së ligjeve të shkruara e të pashkruara”.
“Keqtrajtimi, që u bëhet trupave të vdekur, të hershëm a të vonë, shkakton një revoltë, që nis nga thellësia e psiqikës sonë, sepse shkon kundër pritshmërisë thelbësore të qytetarisë për të trajtuar të vdekurit me respekt, nder e dinjitet”, theksoi.
Sipas tij, SPAK duhet të niste hetimet për rastin fill pas publikimit të pamjeve, megjithatë shtoi se PD do të depozitojë një kallëzim në këtë institucion.
“Partia Demokratike do të kallëzoje në SPAK sërish këtë javë Erion Veliajn, pasi nga sa përcaktohet në ligj, zhvarrimet bëhen me lejen e Kryetarit të Bashkisë dhe depozitimi bëhet në një ndërtesë specifike. SPAK në fakt do duhej të zbarkonte që mbrëmë në zyrat e Bashkisë Tiranë dhe të bënte shembull përgjegjësit e këtij skandali të paimagjinueshëm, i cili ka tronditur çdo qytetar të Tiranës e jo vetëm. Por mesa duket, gjumi letargjik që ka kapur organin e akuzës, dhe frika nga kryebashkiaku i Tiranës, vijon ta mbajë këtë institucion në krahun e keqbërësve dhe të korruptuarve”, shtoi ai në një deklaratë për mediat nga selia blu.
Një reagim për rastin bëri dhe kreu i PD-së, Sali Berisha. Në një postim në rrjetin social “FB”, Berisha shkroi:
“Zbulim horror nga “Piranjat”! Kthetrat e mafjes shtetërore të Erion Veliaj mbi eshtrat dhe skeletet e fëmijëve! Përdhosje primitive e engjëjve”.
Lexo edhe:
VIDEO/ Skandali te varrezat e Tufinës, eshtrat e fëmijëve futen në kuti ëmbëlsirash
