Zbardhen detaje të reja nga ngjarja në Shënvlash të Durrësit, ku 49-vjeçar u vrarë dhe gropos nga fëmijët e tij, të cilët më pas tentuan të fshihnin krimin. Hysen Meta, djali 25-vjeçar i cili bashkë me të motrën 19 vjeçe akuzohen se vranë babanë, Pëllumb Meta, është shprehur në dëshminë e tij për policinë se i ati ishte bërë i padurueshëm.
Për të fshehur trupin dhe groposur në kasollen e lopës i ndihmoi vëllai i vogël 22-vjeçar.
Hysen Meta ka deklaruar se “planin për vrasjen e babait e bëmë së bashku me motrën sepse ai ishte bërë i padurueshëm në familje”, ndërsa vëllai tjetër 22-vjeçar ndihmoi në fshehjen e kufomës.
Sipas tij, krimin e kishin planifikuar dhe vendosën ta realizonin ditën e shtunë më 10 Shkurt. Hysen Meta ka përjashtuar të ëmën nga përgjegjësia penale, duke thënë se ajo nuk kishte dijeni për krimin.
“Vrasjen e kishim planifikuar më herët së bashku me motrën. Vendosëm për ditën e shtunë (10 Shkurt) sepse ishim të gjithë pushim. Babi ndodhej në një nga dhomat e shtëpisë i shtrirë. Në shtëpi ishim vetëm unë, motra dhe vëllai tjetër. Mami po merrej me punët jashtë shtëpisë. Më herët kishim siguruar të gjithë materialet që na duheshin për të mbështjellë trupin. Unë e qëllova babin katër herë në trup. Aty ishte dhe motra, ndërsa vëllai i vogël hyri në dhomë vetëm pasi dëgjoi të shtënat. Nuk u ndikuam nga situata dhe të tre vepruam për ta mbështjellë dhe groposur. Dy ditë më pas (12 Shkurt) lëviza makinën e babit drejt pishave në sektorin Rinia. Në kthim më mori vëllai. Donim që të besohej zhdukja e tij. Më pas më 13 Shkurt vendosa të denoncoj zhdukjen e babit. Babi ishte autoritar dhe i padurueshëm në familje. Nuk kishim rrugë tjetër. Mami nuk ka pasur dijeni për ngjarjen”, ka deklaruar Hysen Meta.
Policia e Durrësit saktësoi mbrëmjen e djeshme se 19-vjeçarja Hygerta Meta, e arrestuar e para për vrasjen, nuk e kreu krimin e vetme, ashtu siç ajo pretendoi fillimisht. Sipas hetimeve, vrasja dhe veprimet e mëpasshme për fshehjen e ngjarjes janë planifikuar nga Hygerta dhe i vëllai Hyseni, i cili ka qenë personi që dyshohet se ka shkrepur këmbëzën e pistoletës. I vëllai tjetër akuzohet se ka ndihmuar në groposjen e trupit.
Nën hetim është vënë edhe nëna e fëmijëve për të zbuluar nëse edhe ajo ka pasur gisht apo dijeni për vrasjen e të shoqit.
Shkak i ngjarjes së rëndë në familje dyshohet se kanë qenë konfliktet e vazhdueshme dhe se viktima donte të fejonte vajzën Hygerta me një djalë të cilin ajo nuk e pëlqente. Pasi vranë babain dy fëmijët ja varrosën trupin në kasollen pranë shtëpisë së tyre, ndërsa makinën e tij e braktisën në rrugë në sektorin Rinia. Më pas djali 24-vjeçar Hysen Meta shkoi në Policinë e Durrësit dhe bëri kallëzim për zhdukjen nga banesa të babait. Por dy javë nga ky kallëzim, grupi hetimor i Durrësit zbuloi se nuk bëhej fjalë për largim të personit nga banesa.
Lexo edhe:
Vrasja e Pëllumb Metës/ Policia: E ekzekutoi i biri, në pranga tre fëmijët
