Komisioneri Publik, Irena Nino ka ankimuar këtë të premte vendimin e Komisionit të Pavarur të Kualifikimit për konfirmimin në detyrë të prokurores së Prokurorisë së Elbasanit, Zena Lilo.
Vendimi për konfirmimin në detyrë të prokurores Zena Lilo u mor më 10 Janar nga trupa e KPK-së e kryesuar nga Olsi Komici, me relatore Valbona Sanxhaktarin dhe anëtare Firdes Shulin, ku u përball me kriten financiar, atë profesional dhe pastërtinë e figurës.
Por, ajo nuk i ka mbyllur ende llogaritë me vettingun, pasi Komisioneri Publik ndan gjykim të kundërt, pasi
vlerëson se subjekti i rivlerësimit nuk arrin nivel të besueshëm për konfirmimin në detyrë dhe pritet që së shpejti të mbahet seanca në Kolegjin e Posaçëm të Apelimit.
Ankimi i Komisionerit Publik bazohet tek problemet financiare, kryesisht në raportet e ILDKPKI-së, ku konstatohet për prokuroren në fjalë se: “Deklarimi nuk është i saktë në përputhje me ligjin; Ka mungesë dokumentacioni ligjor për të justifikuar burimin financiar të pasurive; Ka mosdeklarime të pasurive ndër vite;”.
Komisioni ka konstatuar pamundësi të subjektit dhe bashkëshotit të saj për pagesën e dy kësteve për një apartament 2+1 të blerë në vitin 2011 në Tiranë. Është konstatuar pamundësi në shumën 2.3 milionë lekë për pagesën e një kësti 55 mjë euro në vitin 2008 dhe balancë negative 274 mijë lekë në vitin 2011 për shlyerjen e këstit të dytë rreth 6000 euro.
Gjithashtu është vërejtur se nga verifikimet e kryera ka rezultuar se bashkëshorti subjektit ka derdhur në llogari bankare shuma parash, por nuk është provuar burimi i ligjshëm i tyre.
Po ashtu, ka rezultuar bilanc negativ në shumën rreth 630 mijë lekë për krijimin e një depozite bono thesari në vlerën 3.8 milionë lekë, me burim të deklaruar pagat e subjektit si prokurore dhe të bashkëshortit si mjek. Nga analiza financiare e përgjithshme paraprake është konstatuar pamundësi totale në vlerën 4.3 milionë lekë.
Zena Lila përfundoi studimet në Shkollën e Magjistraturës në vitin 2003 dhe punon prej dy dekadash si prokuore në Prokurorinë e Elbasanit.
