Deputetja Albana Vokshi hodhi akuza ndaj kryeministrit Edi Rama, duke e konsideruar atë si një tradhtar që shet çdo ditë tokën dhe detin e Shqipërisë.
Duke folur para protestuesve demokratë, Vokshi u bëri thirrje shqiptarëve që të protestojnë, jo për PD-në, por për Shqipërinë që po shitet si plaçkë lufte për interesa të një njeriu. Sipas saj, po jetojmë në diktaturë dhe autokraci.
“Duhet të ishim më parë këtu në këtë shesh. Kemi kaluar dy vite të vështira, përpara një sulmi frontal për të shkatërruar opozitën. Përdorën të gjitha format, para, presione, kërcënime, pengje, lobime brenda dhe jashtë, por nuk ia dolën. Ja ku jemi këtu. Jemi më të fortë. U bëmë bashkë duke kapërcyer mllefet. Është një rrugë pa kthim, për ta hequr këtë mallkim që na ndjek dhe përndjek dhe që e ka emrin Edi Rama.
Një thirrje kam për shqiptarët, ngrihuni, protestoni jo për Partinë Demokratike, por për Shqipërinë tonë të përbashkët. Shqipëria jonë është në rrezik. Shqipëria po shitet si plaçkë lufte për interesa të një njeriu që është Edi Rama. Edi Rama nuk është kundërshtari ynë politik, por një tradhtar. Në çdo takim që bën shet një copë tokë, shet një copë det. Në çdo karrige që ulet ka premtuar diçka për të shitur. Në asnjë tryezë nuk ulet si kryeministri dinjitoz i një vendi sovran por si një matrapaz.
Çdo njëri prej jush është një lajm i keq për Edi Ramën dhe klikën e tij mafioze. Sot kemi një kryeministër që ka më shumë pushtet se çdo diktator autokrat i kohës sonë. A kemi ne sot drejtësi të pavarur? Jo! A keni ne sot një parlament që kontrollon qeverinë? Jo! A kemi ne sot komisione hetimore parlamentare qwë të kontrollojnë Ramën? Jo se Edi Rama i zhbëri ato. Jemi në autokraci është nënshkrim i shqiptarëve me diktaturën dhe shtrëngimin e çapës së bukës.”, tha ndër të tjerash Vokshi.
