Interi triumfoi bindshëm 4-0 ndaj Salernitanës së vendit të fundit dhe u shkëput me +10 pikë në krye të renditjes, duke hedhur një tjetër hap të madh drejt titullit kampion të 20 në histori, që do të pasohej me yllin e dytë në fanellë.
Krahas stadiumit të mbushur sërish dhe një 90-minutëshi thuajse perfekt, e premtja ishte edhe dita e duhur për debutimin e kanadezit Tajon Buchanan me fanellën zikaltër, futbollist ky i afruar në merkaton e janarit.
Buchanan mori vendin e Bastonit në minutën e 77’, teksa tifozeria zikaltër e inkurajoi menjëherë me ovacione, teksa në fushë kanadezi tregoi menjëherë cilësitë e tij teknike, ndonëse këtë herë në krahun e majtë të mesfushës dhe pas ndeshjes nuk e fshehu emocionin e debutimit.
“Është një ëndërr që bëhet realitet, të luaj për Interin, para kësaj tifozerie në “San Siro”. E prisja këtë moment, pasi kam punuar shumë dhe tani shpresoj vetëm të vazhdoj kështu. Skuadra më ka qëndruar pranë që ditën e parë dhs trajneri më këshillon vazhdimisht. Mund të luaj në disa pozicione në fushë dhe shpresoj të ndihmoj sa më shumë skuadrën”, tha Buchanan.
