Turqia ka miratuar kërkesën e ekstradimit në Shqipëri të të shumëkërkuarit të drejtësisë, Dritan (Gramoz) Rexhepi, i cili u arrestua fillimin e nëntorit të vitit të kaluar në Stamboll.
Ky fakt është pohuar në Gjykatën e Posaçme nga avokatja e Rexhepit, ku ai është marrë i pandehur për rrëmbimin dhe zhdukjen e Jan Prengës. Avokatja e Dritan Rexhepit ka thënë se javën e ardhshme pritet miratimi nga ministri turk i Drejtësisë për ekstradimin e Rexhepit.
Dritan Rexhepi është në kërkim nga drejtësia shqiptare, po ashtu edhe në Itali, shtet i cili luajti rol të rëndeësishëm në arrestimin e tij në Stamboll.
“Ky shtetas është shpallur në kërkim ndërkombëtar nga Interpol Tirana, më datë 26.03.2006, pasi Gjykata e Shkallës së Parë për Krimet e Rënda, Tiranë, me vendimin e datës 06.06.2013, e ka dënuar me 25 vjet burgim, për veprën penale “Vrasja me paramendim”, kryer në bashkëpunim, “Plagosja e rëndë me dashje”, kryer në bashkëpunim dhe “Mbajtja pa leje dhe prodhimi i armëve, armëve shpërthyese dhe i municionit”.
– Gjykata e Shkallës së Parë Fier, me vendimin e datës 26.11.2015, e ka dënuar me 4 vjet burgim, për veprat penale “Falsifikimi i letërnjoftimeve, i pasaportave ose vizave”, në rrethana rënduese dhe “Falsifikimi i vulave i stampave ose formularëve”, në rrethana rënduese.
– Gjykata e Shkallës së Parë Tiranë, me vendimin e datës 31.01.2020, i ka caktuar masën e sigurisë “Arrest në burg”, për veprat penale “Rrëmbimi ose mbajtja peng e personit” dhe “Trafikimi i narkotikëve”.
Gjithashtu, ky shtetas është shpallur në kërkim ndërkombëtar nga Interpol Roma, Itali, më datë 29.09.2011, pasi Gjykata e Apelit Firence, Itali, me vendimin e datës 15.04.2010, e ka dënuar me 16 vjet e 5 muaj burgim (pjesa e mbetur e dënimit 13 vjet, 8 muaj e 6 ditë burgim), për veprën penale “Grup kriminal me qëllim trafikimin e narkotikëve”, parashikuar nga Kodi Penal i Italisë”, njoftonte Policia e Shtetit.
43 vjeçari, i cilësuar si koka e kartelit të drogës, u arrestua në Stamboll me një pasaportë kolumbiane, të regjistruar me emrin Benjamin Omar Perez Garcia.
