Kryetari i Partisë Demokratike, Sali Berisha, në fjalën e tij përpara protestuesve këtë pasdite, është shprehur se për herë të parë në një vizitë zyrtare, një Sekretar Shteti takon vetëm përfaqësues të një partie: Presidentin, Lali Vjedhësin, Edi Ramën, Altin Dumanin, Sokol Sadushin dhe me radhë.
Berisha tha se PD, forca politike që përmbysi komunizmin, forca politike që u bë promotor kryesor i marrëdhënieve miqësore mes Shqipërisë dhe SHBA dhe vendeve perëndimore, e anëtarësimit të Shqipërisë në NATO, ka qenë dhe mbetet e vendosur gjithnjë për të vazhduar në këtë rrugë bashkëpunimi miqësie në kuadrin e NATO-s dhe në kuadrin bilateral.
Gjatë fjalës së mbajtur në tubimin qytetar, Berisha ka paralajmëruar Edi Ramën dhe Erion Veliajn që të mos gëzojnë shumë sepse do të kenë fatin e Saimir Tahirit dhe Charles McGonigal.
Berisha bëri me dije se “asgjë nuk mund të na shmangë ne, asgjë nuk do na pengojë ne pa rivendosur pluralizmin, votën e lirë, pa shpëtuar Shqipërinë nga regjimi i narkomafies”.
Kryetari i Partisë Demokratike ka përshëndetur edhe banorët e Himarës për protestat e tyre. Berisha i ka bërë thirrje edhe Komisionit Europian që të reagojë për çështjen Beleri.
