Drejtuesi i Partisë së Lirisë në Qarkun e Beratit, Lefter Maliqi, deklaroi këtë të hënë se PL-ja ka nisur punën për organizimin dhe mobilizimin e strukturave të kësaj partie për t’u hapur në çdo cep të vendit në kuadër të zgjedhjeve të ardhshme parlamentare.
Në një intervistë televizive, Maliqi u shpreh i gatshëm për një përballje televizive me drejtuesin e PS-së në këtë qark, Bledi Çuçi.
“Jam totalisht i mobilizuar për ta nxjerrë fitues PL-në në qarkun e Beratit. Natyrisht që pres një rikthim në Bashkinë e Kuçovës. Ka një nuhatje nga kryeministri për të gjitha shkeljet e mazhorancës që ai ka bërë, ndaj Rama u shfaq dje i tensionuar në Asamble ku bëri presione ndaj të tijve për zgjedhjet. Ndryshe nga zgjedhjet vendore, Rama e ka të pamundur fitoren në këto zgjedhje. Për të shpëtuar vendin nga ky krim e korrupsion, rrotacioni politik është jetik”, tha Maliqi për “Ora News”.
“Unë e kam të pamundur ta mendoj për një fitore të PS-së. Jam tejet i bindur se maksimumi me gjithë mekanizmat e tij kriminalë, Rama merr më pak se 60 mandate”, shtoi ai.
