Edhe pse Gjykata Kushtetuese pezulloi dekretin e presidentit Bajram Begaj për zhvillimin e zgjedhjeve në Tiranë më datë 9 nëntor, Edi Rama nuk e pezulloi fushatën elektorale.
Strukturat e PS në Tiranë u udhëzuan të vazhdojnë punën si normalisht pasi nuk ka anulllim të zgjedhjeve por vetëm pezullim të dekretit dhe vendimi merret më 31 tetor.
“Sikurse u theksua edhe mbrëmë, vendimi i sotëm nuk i prek zgjedhjet e 9 nëntorit. Vendimi përfundimtar i Gjykatës do të jepet më 31 tetor. Vazhdoni punën, ju rikujtoj për takimet e sotme sipas orareve dhe grupeve përkatëse”, mësohet se ka njoftuar PS strukturat në Tiranë.
Por kreu i KQZ, Ilirjan Celibashi i ka prerë sot hovin liderit Rama. Celibashi deklaron se që nga vendimi i GJK është pezulluar procesi i përgatitjes së zgjedhjeve për Tiranën, por vijon normalisht për 5 bashkitë e tjera.
Celibashi shton më tej se do të shkelnin Kushtetutën dhe Kodin zgjedhor nëse KQZ do vijonte me procesin përgatitor për zgjedhjet në Tiranë.
“Vijon normalisht procesi i përgatitjeve për zgjedhjet në 5 bashkitë e tjera. Çdo veprim i KQZ i çdo natyre apo angazhimi tjetër që lidhjet me zgjedhjet në Tiranë është pezulluar ë ditën e djeshme. Pra në datën 9 nëntor është e siguritë që do të zhvillohen zgjedhjet në 5 bashkitë e tjera, Vlorë, Berat, Tepelenë, Cërrik dhe Mat.
Në momentin që GJK pezullon atë pjesë të dekretit, është sikur ai dekret të mos ekzistojë përkohësisht për atë pjesë që ka urdhëruar GJK. Do të shkelnim Kushtetutën dhe Kodin zgjedhor nëse KQZ do vijonte me procesin përgatitor për zgjedhjet në Tiranë”, tha Celibashi në një deklaratë për mediat.
