Detaje të reja kanë dalë në dritë nga ngjarja që ndodhi mbrëmjen e kaluar në Shkodër, ku u plagos me armë zjarri, 60-vjeçari, Selami Brahimi. Ngjarja ndodhi rreth orës 17:55, në lagjen 10 Korriku në hyrje të qytetit, ku Brahimi u qëllua me breshëri plumbash teksa po hipte në makinën e tij që e kishte parkuar përballë një dyqani.
Ai mbeti i plagosur dhe u transportua në spital për të marrë ndihmë mjekësore, ku ndodhet jashtë rrezikut për jetën, teksa ditën e sotme ka dhënë dhe dëshminë e tij për grupin hetimor.
Në dëshminë e tij, Brahimi shprehet se ka shpëtuar për mrekulli sepse në sekondat e fundit kur është qëlluar ka kthyer kokën dhe i ka shpëtuar atentatit duke mos e marrë plumbin në kokë por në pjesën e sipërme të fytyrës. Ai ka mohuar të ketë konflikte me njeri.
“Unë sapo lashë mbesën time tek një punonjës që është afër picerisë. Sapo jam ulur poshtë më kanë qëlluar. Kam shpëtuar për mrekulli sepse në atë moment jam kthyer dhe plumbi më kapi fytyrën sepse ndryshe mund të më kishin qëlluar në kokë. Nuk kam arritur që të shoh asgjë. Nuk kam asnjë problem me askënd dhe nuk e di kush mund të jenë autorët. Po ashtu nuk kam arritur që të shoh asnjë makinë apo mjet tjetër të autorëve. Nuk kam pasur asnjë kërcënim apo problem ndaj nuk e kam idenë se kush më ka qëlluar dhe për çfarë arsye”, mësohet të ketë thënë i plagosuri.
Burime kanë bërë me dije se drejt shtetasit Selami Brahimi është qëlluar afro 10 herë me automatik kallashnikov por vetëm një plumb e ka kapur në pjesën e fytyrës. Po të njëjtat burime shtojnë se autorët kanë qenë në këmbë, teksa kanë qëlluar nga pas automjetin. Mësohet se Selami Brahimi ka kaluar nga krahu i pasagjerit, për t’iu shpëtuar plumbave.
Ende nuk dihet identiteti i autorëve, apo arsyet e atentatit ndaj 60-vjeçarit, ndërsa kreu i policisë së Shkodrës, në një reagim të bërë mbrëmjen e shkuar, tha se përveç dëshmisë së të plagosurit dhe dëshmitarëve, janë marrë edhe kamerat e sigurisë në zonë, me qëllim zbardhjen e ngjarjes.
Sakaq ditën e sotme në Shkodër janë shoqëruar disa persona që dyshohet se janë të implikuar në atentat dhe kanë informacione mbi rastin, ndërsa po zhvillohen të tjera kontrolle nga forcat RENEA që kanë mbërritur që mbrëmë pas plagosjes së 60-vjeçarit.
Policia vijon hetimet për zbardhjen e plotë të kësaj ngjarje.
