Deputetja e Partisë Demokratike, zonja Ina Zhupa, foli rreth ngjarjeve të sotme në Kuvend.
Në intervistën e Fax News, Zhupa u shpreh se seanca e sotme ishte seanca e radhës ku opozita i kërkon mazhorancës respektimin e e deputetëve opozitar dhe ngritjen e komisioneve hetimore. Por edhe sot nuk kishte normalitet pasi mazhoranca shkeli normat kushtetuese.
Ajo tha se edhe pse opozita përdori miell dhe vezë, thelbi i gjithë kësaj është që parlamenti të mos kthehet në një fasadë, por t’i kthehet normalitetit si dhe të respektojë të drejtat e opozitës.
“Ne po luftojmë që të mos shkelet Kushtetuta, ndërsa ata vazhdojnë të marrin vendime arbitrare. Kjo nuk është minur për ne, por për ata. Ata u trëgojnë shqiptarëve se bëjnë çfarë u thotë Edi Rama, ngrejnë kartonat me komandë, pa e ditur se për çfarë bëhet fjalë. Nuk është vetëm mënyra e sotme. Përshkallëzimi vjen me përfshirjen e qytetarëve. Opozita ka thirrë të gjithë qytetarët për të protestuar më 20 shkurt, si një simbolikë e rrëzimit të bustit të diktatorit. Ish-numri 2 i qeverisë doli dhe foli për korrupsionin “kapilar”, se si duke ngrënë qofte në verandë, Edi Rama ndante tokat. Këto janë tronditëse. Në çdo vend normal, kjo do të çonte në largimin e qeverisë. Këtu është detyra e qytetarit të kërkojë llogari. Sot ata paguajnë për inceneratorë që nuk ekzistojnë. Qeveria po largon nga Shqipëria të gjithë shtresën e mesme. Ne do të protestojmë për inceneratorët, për koncesionet në shëndetësi, për arsimin etj.“, tha Zhupa.
Pyetjes se cilat forca të tjera opozitare do t’i bashkohen protestës, Zhupa iu përgjigj: “Protesta pret cilindo që e ndjen veten opozitar, cilindo që ndjen se ky vend po keqqeveriset, cilindo që qeveria i ka vënë lakun në fyt. Unë i ftoj që të gjithë që të jenë pjesë e protestës. Kam bindjen që të gjithë aleatët që na janë bashkuar në protestat e tjera, do të na bashkohen dhe më 20 shkurt. Kushdo që e ndjen veten opozitar, është i detyruar të vijë.”
Zhupa u shpreh që edhe pse kjo protestë është e organizuar nga opozita, kanë qenë qytetarët ata që kanë bërë thirrje për protestë kombëtare. E pyetur rreth fjalëve se Lulzim Basha ka kërkuar një “armëpushim” midis palëve të Partisë Demokratike, Zhupa tha:
“Deputetët që kanë kërkuar Reformën Zgjedhore, gjithmonë kanë lënë dyert e hapura e kanë bërë thirrje për bashkim. Ne nuk jemi në luftë, por disa faktorë kanë sjellë që të mos kemi një opozitë reale”.
Pyetjes nëse janë gati deputetët që të ulen në një tryezë me Bashën dhe të bisedojnë rreth një bashkëpunimi të mundshëm, Ina Zhupa iu përgjigj: “Kjo çështje nuk diskutohet më. Ne nuk flasim për përçarje apo bashkim të demokratëve. Ne po diskutojmë se si të bëhemi më të fortë, të garantojmë të drejtat tona kushtetuese, të drejtat e qytetarëve dhe të përgatitemi për zgjedhjet e vitit 2025”.
