GJKKO ka dënuar me 2 vjet burg për shpërdorim detyre ish-kryebashkiakun e Kukësit Safet Gjici, ndërsa ka dhënë 1 vit burg për Alma Kaçin me akuzën e prostitucionit, në lidhje me video-skandalin në zyrën e socialistit.
Gazetari Eni Ferhati tha në emisionin “Now” në Euronews Albania se vendimi i gjykatës ishte i sforcuar dhe hetimi jo i thelluar. Sipas tij, duhej hetuar edhe Abedim Oruçi, ish-kreu i Qarkut Kukës që vetë Gjici e akuzon si personi që ka porositur videoskandalin dhe me të cilin ka pasur konflikte prej kohësh.
Gazetari tregoi dhe një episod nga përplasjet e vjetra mes tyre, ku sipas tij, Abedin Oruçi i ka lënë në banesë edhe një palë këpucë Gjicit, duke i përcjellë mesazhin se duhet të zhduket sa më parë.
“Alma Kaçi ka përmendur Abedin Oruçin, për të cilin vetë Gjici ishte shprehur në gjykatë se ishte porositësi i videoskandalit pasi me të kishte pasur konflikte. Duhet të ishte bërë një hetim më i thelluar, edhe fakti që Oruçi nuk hetohet edhe pse është akuzuar nga vete Gjici. Ka pasur një histori të shtrirë në kohë në Kukës lidhur me konfliktet mes të dyve, sa ka shkuar deri në përdorimin e skemave të kërcënimeve zakonore të asaj krahine. Oruçi i ka lënë në shtëpi Gjicit një palë këpucë, që është një kërcënim që tregon se duhet të largohesh, të zhdukesh që këtu”, tregoi gazetari Ferhati.
Përplasjet Safet Gjici – Abedin Oruçi
Mes Safet Gjicit dhe Abedin Oruçit ka një përplasje të vjetër. Rreth 4 vite më parë dy burrat ishin përfshirë në një sherr, pasi Oruçi pretendoi se i kishte shlyer detyrimet ndaj bashkisë për një hotel që kishte në pronësi, ndërsa bashkia kishte konstatur një pjesë të ndërtimit të paligjshëm.
Kur policët shkuan ta arrestojnë në hotelin e tij në Kukës në vitin 2021, Abedin Oruçi u drejtoi armën efektivëve, por pa i qëlluar. Ai mundi t’u shpëtojë duke u arratisur. Dosja u mbyll disa vite më pas.
Nga 2015 deri në 2019, Abedin Oruçi ka qenë drejtuesi i qarkut të Kukësit, përfaqësues i PDIU-së. Në zgjedhjet vendore të 2019, Oruçi ka qene rival me Gjicin për bashkinë e Kukësit nën siglën e Bindjes Demokratike, ndërsa në 14 Maj ishte kandidat për bashkinë e Kukësit nën siglën e Partisë për Europianizimin dhe Integrimin e Shqipërisë.
