Gjykata e Posaçme kundër Korrupsionit dhe Krimit të Organizuar ka rrëzuar kërkesën e kreut të PD-së Sali Berisha për të marrë pjesë në seancat plenare, e cila ishte apeluar pasi më herët ishte rrëzuar nga SPAK.
Berisha ndodhet nën masën e sigurisë “arrest shtëpie” në lidhje me dosjen e privatizimit të ish-kompleksit “Partizani”, teksa sipas avokatëve të tij, nuk mund t’i hiqet e drejta për të marrë pjesë në Kuvend, por kërkesa e tyre është rrëzuar nga gjykata.
Pas dhënies së vendimit, avokati i Berishës, Genc Gjokutaj u shpreh se do të vazhdojnë betejën ligjore duke ankimuar këtë vendim. Sipas tij, “pa u ndryshuar porosia e Ramës nuk ndryshon vendimi i gjykatës”.
“Ata vazhduan në të tyren ne do vazhdojmë betejën tonë. Edhe praktikat e Strasburgut dhe argumentimet që bëmë nuk arriti gjykata të konkludonte. Pa ndryshuar porosia e Ramës nuk ndryshon vendimi i kësaj gjykate”, tha avokati Genc Gjokutaj pas përfundimit të seancës.
Më herët, eksponentë të PD-së e kanë konsideruar këtë vendim si të qëllimshëm, me urdhër të mazhorancës, për t’i hequr mandatin kreut të PD-se Sali Berisha pas 6 muajsh.
GJKKO ka vendosur masën e sigurisë “arrest në shtëpi” me mbikqyrje policore, ku i ndaloi dhe kontaktet me personat e tjerë, përveç se me familjarët që qëndrojnë në të njëjtën banesë. Sipas vendimit, Berisha është i detyruar të qëndrojë në adresën e shtëpisë së tij në rrugën “Mustafa Matohiti”.
Kjo masë është lënë në fuqi edhe nga Apeli i Posaçëm, teksa dy prokurorët e SPAK të kësaj çështje janë, Arben Kraja dhe Enkeleda Millonai.
Si ish-kryeministri Sali Berisha, po ashtu edhe avokatët e tij dhe Partia Demokratike e kanë konsideruar vendimin e GJKKO-së, si të diktuar nga kryeministri Edi Rama për të goditur opozitën dhe për t’i mbyllur gojën kreut të saj.
Ndërkohë deputetët dhe simpatizantët demokratë i kanë shkuar Sali Berishës pothuajse çdo ditë në mbështetje poshtë pallatit ku banon, teksa pritet që të mblidhen edhe ditën e sotme në orën 17:00.
Më herët GJKKO i kishte caktuar Sali Berishës masën e sigurisë “detyrim paraqitje” si dhe “ndalim të daljes jashtë shtetit”. Megjithatë, Sali Berisha refuzoi që të paraqitej në gjykatë të hënën e parë dhe të tretë të çdo muaji duke argumentuar se vendimi ishte antikushtetues, pasi nuk ishte marrë më parë autorizim për heqjen e imuniteti ndaj tij. Por SPAK i qëndroi mendimit se masa e sigurisë “detyrim paraqitje” si dhe “ndalim të daljes jashtë shtetit” ishin të një karakteri që konsiderohen kufizime dhe jo heqje lirie. Për këtë shkak SPAK kërkoi shtrëngimin e masës së sigurisë në “arrest shtëpi”.
Berisha akuzohet nga SPAK për kryerjen e veprës penale “Korrupsioni pasiv i funksionarëve të larte shteterore ose te zgjedhurve vendore, kryer në bashkëpunim. Ish-kryeministri i ka konsideruar akuzat ndaj tij dhe dhëndrit të tij Jamarbër Malltezi, si sulm politik, pasi sipas tij, nuk ka asnjë fakt dhe dokument që të ngrihen dyshimet mbi akuzat.
Sipas SPAK-ut, Berisha në kohën kur ka qenë kryeministër ka vendosur në funksion të interesave të dhëndrit të tij bazën ligjore, si edhe ka ushtruar presion mbi vartësit për të nxitur plotësimin sa më të shpejtë të procedurave të kthimit të pronës dhe privatizimit të godinave të degraduara të ish-klubit sportiv “Partizani”. Ndërsa, për Jamarbër Malltezin dhe ndërtuesin Fatmir Bektashi, SPAK-u deklaron se ata kanë përfituar shuma të mëdha financiare nga tjetërsimi i truallit në ndërtime të larta.
