Shërbimi Qendror Investigativ kundër krimit të organizuar dhe Guardia di Finanza e Torinos kanë ekzekutuar mëngjesin e sotëm operacionin e koduar “Malok 2019”.
24 shqiptarë e italianë janë vënë në pranga nën akuzën e trafikut të drogës kryesisht të tipit kokainë e marijuanë.
Hetimet zbardhën se dy grupime kriminale bashkëpunonin me njëri-tjetrin. Një grup kishte bazën në Torino me degë të shtrira në të gjithë rajonin e Piemontes e territorin përreth. Grupi drejtohej nga një shqiptar që prej 20 vitesh jetonte në provincën e Torinos. Përmes korrierëve të shumtë kishte aftësinë financiare e menaxhuese të trafikonte kokainë e marijuanë në territorin e Toskanës, Torinos, Asti e Cuneo.
Grupi i dytë i drejtuar po nga një shqiptar 39-vjeç me banim në Aleksandri, furnizohej me kokainë, hashash e marijuanë nga Shqipëria drejt Italisë. Transporti i drogës bëhej përmes automjeteve të modifikuar për fshehjen e lëndës narkotike.
Gjatë fazës investigative, narko-trafikantëve u janë kapur 45 kg kokainë, 150 kg marijaunë, 1.5 kg hashash e 900 mijë euro para.
Sipas Guardia di Finanza, fitimet që do të sillte kjo sasi droge e sekuestruar do t’i sillte kësaj organizate kriminale një fitim të paktën prej 6 milionë euro.
