E shkurtër dhe me tensione ka qenë edhe seanca e sotme plenare në Kuvend, ku mazhoranca në shkelje të çdo të drejte dhe ligji, ka tentuar ta mbajë e vetme seancën, duke lënë me forcë deputetët e opozitës jashtë sallës.
Deputetët e opozitës kanë tentuar të futen të gjithë sot në Kuvend, edhe 19 të përjashtuarit nga mazhoranca, por përveç se me qindra policë që kishin ardhur për protestuesit, janë hasur edhe me kordonin e Gardës së Republikës tek dera e jashtme e Kuvendit, duke mos lënë me forcë asnjë prej tyre të futen në sallë.
Edhe të papërjashtuarit nuk janë lejuar të futen në Kuvend, në kundërshtim me ligjin, por teksa ata po përplaseshin fizikisht me gardistët, kryetarja e Kuvendit, Lindita Nikolla nuk i ka interesuar kjo gjë, por ka nisur seancën vetëm me deputetët e mazhorancës, teksa nga opozita në sallë ishin vetëm 4 deputetët e PDIU-së me Shpëtim Idrizin në krye.
I pranishëm në seancën e sotme në Kuvend ka qenë edhe kryeministri Edi Rama, i cili është futur në këmbë nga dera e pasme.
Jashtë Kuvendit, njëkohësisht po mbahej edhe protesta e demokratëve, që po ashtu kanë patur përplasje me efektivët e Policisë së Shtetit.
Pas disa minutash përplasje me gardistët, katër deputetët e PD-së, Flamur Noka, Gazment Bardhi, Asllan Dogjani dhe Bledjon Nallbati kanë arritur të çajnë kordonin dhe të futen në sallën e Kuvendit.
Pasi janë futur në seancën plenare, katër deputetët demokratë janë përplasur fillimisht me gardistët rreth Foltores dhe më pas kanë ndezur një zhurmues duke mos lejuar normalitetin në sallë.
Në këto momente, me urdhër të Edi Ramës, kryetarja e Kuvendit Lindita Nikolla urdhëroi mbylljen e seancës vetëm pas rreth 15 minutash.
Pas përfundimit të seancës plenare, kreu i grupit parlamentar të PD-së, Gazment Bardhi tha se Garda e Republikës me urdhër të Edi Ramës po tenton që të lërë deputetët jashtë Kuvendit. Ai shtoi më tej se është e paimagjinueshme si deputetët e opozitës të shqyhen nga këmisha dhe kostumi. Bardhi po ashtu pohoi se do të bëhet pjesë e protestës.
“Sot në Kuvend kishte ardhur bashkëpunëtori i Arben Ahmetajt. Me një urdhër të paligjshëm deputetët e opozitës u penguan të futen në sallën e seancës plenare. Garda e Republikës me urdhër personal të Ramës tentoi të lërë jashtë deputetët e opozitës. Vetëm në vende me regjime autoritare ndodh që deputetët e opozitës nuk lejohen që të futen në Kuvend. Është e paimagjinueshme për një vend anëtar të NATO-s që deputetët duhet të shqyhen nga këmisha dhe kostumi që të futen në sallat e seancës plenare. As garda e republikës as policia që dhunon qytetarët nuk e ndal opozitën nga përballja me regjimin e Edi Ramës. Do ti bashkohem çdo lloj proteste kundër Edi Ramës.”- tha Bardhi.
Ndërkohë, kryetari i grupit parlamentar në Partinë Socialiste Bledi Çuçi ka paralajmëruar se do të ketë sërish përjashtime për deputetët e opozitës.
“Ishte shfaqje e shëmtuar. Besoj e kemi pasur të qartë para rregullit dhe zhvillimit normal të parlamentit nuk do të na ndalë asgjë. Përjashtimet do të vijojnë nëse do të kemi sërish tensione në parlament apo në komisione. Askush nga deputetët e papërjashtuar nuk do të ndalohet nuk është ndaluar asnjëherë. Nuk është ndaluar as sot. Nuk e ndoqa pasi unë isha brenda. Askush nuk e ka ndaluar një njeri që nuk ka qenë i përjashtuar në seancë. Ky teatër merr kolegët e përjashtuar të futen me zor është teatër absurd.”- tha Çuçi.
Pas mbylljes së seancës plenare, të gjithë deputetët e opozitës i janë bashkuar protestës së thirrur nga Partia Demokratike, ku kanë mbajtur dhe fjalimet e tyre para demokratëve.
