Policia e Vlorës ka vënë në pranga një person të shpallur në kërkim në kuadër të një operacioni që çoi në sekuestrimin e 500 kilogramëve drogë.
Policia njofton se ndaj Kristian Skendajt nga Vlora ishte dhënë masa e sigurisë ‘arrest me burg’ për veprën penale “Prodhimi dhe shitja e lëndëve narkotike”.
48-vjeçari ishte shpallur në kërkim në kuadër të operacionit “Reset”, i cili është zhvilluar në dhjetor 2023. Ky shtetas, në bashkëpunim me persona të tjerë, përpunonin dhe më pas transportonin lëndë narkotike kanabis, në afërsi të vijës ujore, për ta transportuar më pas me rrugë detare drejt Turqisë.
Në kuadër të këtij operacioni të zhvilluar në fund të vitit të kaluar, u vunë në pranga 7 persona dhe u sekuestruan 34 pako të madhësive të ndryshme, me lëndë narkotike cannabis sativa, me peshë totale 500 kilogramë.
