Kryetari i “vulës”, Lulzim Basha ka reaguar për herë të parë pas rrëfimit nga arratia të ish-zv/kryeministrit Arben Ahmetaj i cili e akuzoi drejtpërdrejt Edi Ramën si të përfshirë në aferën e inceneratorëve.
Gjatë një postimi në rrjetet sociale, Basha shkruan se në një vend normal kryeministri duhet të kishte dhënë dorëheqjen, por me Edi Ramën ndodh e kundërta pasi rrit akoma edhe më shumë arrogancën.
Duke përdorur frazën e kryeministrit “kokat hëngshin”, Basha shkruan se kjo qeveri vjedh çdo ditë shqiptarët.
“Është e qartë se këta operojnë si bandë kriminale dhe me kode mafioze kërcënojnë njëri-tjetrin. Njëri del në dosje me krimin, tjetri në pazare korrupsioni, tjetri kanabizon Shqipërinë.
Tani e pranojnë vetë dhe të gjithë tregojnë me gisht Edi Ramën. Kudo tjetër kryeministri do të ishte dorëhequr, por në rastin e tij sa më i madh abuzimi aq më e madhe arroganca.
Se çfarë bëjnë me njëri-tjetrin, kokat hëngshin, por çfarë shqetëson shqiptarët është se ata të gjithë bashkë nuk kanë ngrënë kumbulla e dardha, por paratë e shqiptarëve, kanë abuzuar me pasuritë e tyre. Dhe për këtë duhet të japin llogari para drejtësisë, nga i pari tek i fundit”, shkruan Basha.
