Kreu i LZHK-së, Dashamir Shehi i ftuar në News 24 ka deklaruar se rruga që opozita të fitojë zgjedhjet e 2025, nuk është bashkimi rreth një lideri, por secili grup të futet i vetëm në garë dhe pas zgjedhjeve të bashkohen për të krijuar qeverinë.
Ai shton se grupimi me më shumë mbështetës mund të vendosë më pas për emrin e kryeministrit. Dash Shehi u shpreh se po punon për krijimin e një grupimi të ri, i cili mund të jetë dhe koalicion, teksa platformën sipas tij, e kanë gati.
“Konfederatë e opozitës? Nuk jam pjesë e saj, nuk kemi rënë dakord. Jemi ftuar të aderojmë por nuk jam dakord sepse gjykoj se nuk është kjo rruga. Brenda opozitës kemi 2-3 grupime, gjykoj se në zgjedhjet e 2025, opozita duhet t’i ofrojë qytetarëve sa më shumë mundësi zgjedhjeje. Nuk mendoj se unifikimi me një lidership është më i vlefshëm për opozitën, është skemë e provuar dhe nuk ka rezultat. Rruga e suksesit për opozitën shqiptare, dhe pse duke absurde, nuk është bashkimi rreth një njeriu, është të hyjë në zgjedhje me disa grupe. Ka ardhur koha për të çarë një trajektore të re. Kur të mbarojnë zgjedhjet të krijojmë një qeveri të përbashkët. Secili grup të marrë mbështetjen që grupimi tjetër si merr., kjo do të sjellë edhe fitoren. I ftoj kolegëve t’i kthehemi politikës me programe politike. Po punoj për një grupim të ri, do hyjmë në zgjedhje me këtë ide. Mund të bëhet një koalicion i ri. Duam tu kthejmë shqiptarëve një opozitë kundër Ramës. Platformën e kemi gati. E para gjë është të kemi një jetë parlamentare normale”, tha Dashamir Shehi.
