Mashtrimi përmes skemave piramidale mashtruese si XUEX është tema e sotme e diskutimit në emisionin “Opinion”. Gjatë diskutimit në studio, gazetari Eni Ferhati zbuloi disa detaje nga hetimet.
Sipas tij, pas skemës piramidale XUEX që ka mashtruar mbi 10 mijë qytetarë dhe ka përfituar deri në 10 milionë euro, fshihet një identitet i dyshuar si inteligjencë artificiale, ndërsa hetimet nga Prokuroria e Fierit janë në zhvillim.
Pjesë nga biseda
Ferhati: Hetimet kanë nisur shumë kohë më parë se të fliste z. Braçe për këtë histori. Sepse mesa duket aty, Leon Smith, profesori britanik i imagjinuar… sepse grupi hetues ka dyshime. Deri në këto momente, nuk është një person fizik. Leo Smith për grupin hetimor të Prokurorisë së Fierit mendohet të jetë një robot, pra inteligjencë artificiale, por pas Leo Smith-it është edhe një person fizik, që po fiton paratë.
Fevziu: Pra, po na vjedhin robotët?
Ferhati: Po, patjetër që po na vjedhin edhe robotët. Policia, me agjentë të infiltruar, po përpiqej të penetronte në këto grupe të Leo Smith. Investuesit fillestarë kanë përfituar vërtet para, si në Lushnjë dhe Divjakë, dhe janë joshur edhe persona të tjerë. Nëse e mbani mend, Rrapush Xhaferri thoshte se fondet e Xhaferrit do të shterrojnë kur të shterrojnë oqeanet. Slogani i kësaj platforme ishte: ‘Investo një herë dhe do kesh investime të përhershme.’ Nëse regjia na ndihmon, kishte edhe postera nëpër lokale. Në këtë kohë, Policia dhe Prokuroria e Fierit kishin arritur që të…
Fevziu: Ky është poster?
Ferhati: Po, poster në një lokal të Lushnjës. Shitej si diçka e ligjshme, por në të vërtetë qindra qytetarë po prekeshin.
Fevziu: Sa janë prekur?
Ferhati: Nuk ka shifra zyrtare. Mund të them që jo vetëm në Lushnjë, Divjakë, mund të themi se mund të jenë mbi 10 mijë persona që janë bërë pjesë e kësaj platforme duke u mashtruar. Bëhet fjalë për deri në 10 milionë euro deri në këto momente…
