Ndërkohë që, Gjykata Kushtetuese pritet të zbardhë vendimin mbi padinë e depozituar nga Komuniteti Mysliman i Shqipërisë, sa i takon ndryshimeve të bëra në ligjin “Për trajtimin e pronave dhe përfundimin e proceseve kalimtare të pronësisë”, një tjetër ankimim është depozituar së fundmi edhe nga shoqata “Pronësi me Drejtësi”.
Në dokumentin prej 40 faqesh, të cilën e disponon Televizioni Scan, kërkohet që të shfuqizohet ligji i rishikuar në vitin 2022, si edhe vendimet e miratuara në zbatim të tij.
“Nëpërmjet ligjt 77/2022 u riinkorporuan parimi i përfitimeve të zbritshme për kategorinë e kompensimeve, ku zëri kadastral i pronës ka pësuar ndryshime, i cili më herët u shfuqizua nga Gjykata Kushtetuese”, thuhet në padi.
Por cila është skema e aplikuar pas ndryshimeve të bëra dy vite më parë? Për, vendimet përfundimtare, që kanë njohur vetëm të drejtën e kompensimit të pronës, kur nuk ka ndryshuar zëri kadastral i pronës së njohur për kompensim, vlera e pronës llogaritet duke u bazuar në zërin kadastral që ka pasur prona në kohën e shpronësimit.
Ndërsa, kur ka ndryshuar zëri kadastral i pronës së njohur për kompensim, vlera e pronës llogaritet duke u bazuar në zërin kadastral aktual. Në këto raste, “Subjekti i shpronësuar kompensohet në masën 10 për qind të vlerës së pronës, sipas zërit kadastral aktual”, thuhet në ligj. Çfarë preken drejtpërsëdrejti nga këto ndryshime janë ato familje që kanë përfituar më herët një pjesë të pronës, pra iu është kthyer, pasi me skemën e re do të marrin 10 për qind të diferencës ndërmjet pronës së mbetur dhe asaj të kthyer.
“Rivlerësimet e kryera përgjatë vitit 2023, jo vetëm nuk ndreqën pabarazitë, që shkaktoi zbatimi i metodës së vlerësimit, por krijuan pasiguri të jashtëakonshme tek kërkuesit të cilët janë detyruar të kundërshtojnë paralelisht me vlerësimet e para dhe vlerësimet e bëra rishtazi për pronën e tyre”, theksohet në dokument, ku vihet në dukje po ashtu se: “Për vendimet që është njohur e drejta e kthimit dhe kompensimit, kjo formulë sjell automatikisht zerimin e kompensimit, duke qenë se sasia e pronës së kthyer është pothuajse e barabartë me atë të pronës objekt kompensimi”.
Në ankimimin e bërë vihet në dukje edhe numri tejet i reduktuar i pronarëve që kanë përfituar kompensimin, pas zyrtarizimit të reformës në 2016-n si edhe fondet e akorduara, qoftë fondi financiar qoftë ai fizik, të cilët sipas shoqatës “Pronësi me Drejtësi” janë të pamjaftueshme për t’i shkuar deri në fund këtij procesi.
/SCAN
