Biznesmeni Bashkim Ulaj është paraqitur mëngjesin e kësaj të marte në ambientet e Gjykatës së Posaçme Kundër Korrupsionit dhe Krimit të Organizuar, ku ka ngritur një padi për shpifje kundrejt dy deputetëve të Partisë Mundësia, Agron Shehaj dhe Erald Kapri.
Padia lidhet me deklarata dhe akuza të përsëritura që, sipas Ulajt, përbëjnë një fushatë të organizuar sulmesh ndaj projektit turistik që kompania “Gener 2” po zhvillon në zonën e Rrjollit në Velipojë.
Sipas raportimeve, biznesmeni i është drejtuar gjykatës duke kërkuar mbrojtjen e reputacionit të kompanisë, ndërsa akuzat e ngritura publikisht i konsideron si përpjekje për gjobëvënie dhe dëmtim të investimit.
Sipas kompanisë “Gener 2”, në projektin në Rrjoll gjendet si palë e tretë duke nënvzizuar se gjithçka është ndërtuar mbi një bazë të plotë ligjore dhe disponon të gjithë dokumentacionin e nevojshëm, përfshirë lejet dhe vendimet gjyqësore të formës së prerë.
Krahas deputetëve Shehaj dhe Kapri, padi janë depozituar gjithashtu edhe ndaj avokatit Ndue Pjetra dhe Prek Molla të cilët gjithashtu akuzohen për shpifje.
