Vetëvrasja e nënkomisarit të Policisë së Durrësit, Arben Pjeçit, i cili i dha fund jetës duke qëlluar veten me plumb në zemër brenda ambienteve të zyrës së tij në komisariat, u diskutua mbrëmjen e sotme në emisionin “Review”. Oficeri ishte në gjendje të rënduar psikologjike, pasi ndaj tij ishte firmosur një urdhër-shkarkimi, për shkak se Gjykata e Apelit e kishte dënuar me vendim të formës së prerë për “Plagosje të lehtë”.
I ftuar në studio, eksperti kriminalistik Artan Rexhepi tha se është e pamundur që zhurma e pistoletës të mos jetë dëgjuar nga kolegët në zyrën ngjitur. Ai tha se nëse një gjë e tillë ka ndodhur atëherë ka një mungesë vigjilence totale në atë komisariat. Rexhepi shtoi se mbyllja e derës të lë të kuptosh se kemi të bëjmë me një vetëvrasje dhe jo me një vrasje.
“Mosdëgjimi i zhurmës i bie që brenda komiariatit mund të shkosh të kryesh një operacion dhe të rrëmbesh ndonjë nga të ndaluarit, i bie mungesë vigjilence totale. Nëse dera ka qenë e mbyllur është një fakt që i shkon vetëvrasjes. Pasi zakonisht në rastet e vetëvrasjes personi merr masa dhe ka një vendosmëri të lartë që ta kryejë krimin. Ngelet për t;u parë, por kjo pjesa e mosdëgjimit të armës është një mungesë serioziteti. Dyshoj se kanë zbuluar më parë dhe nuk kanë ditur si të reagojnë. Është një ngjarje shumë e rëndë pas ju ka peshuar shumë në aspektin moral dhe institucional pasi kemi dëgjuar fjalë të mira për të ndjerin. Kam përshtypjen që e kanë patur një gur të rëndë mbi shpinë, nëse nuk është pista e tjetër e vrasjes, për të cilën them se ka probabilitet shumë të ulët që të ketë ndodhur”, tha ai.
