Fermerët e qarkut Gjirokastër dhe Vlorë kanë protestuar sërish këtë të premte tek vendi i quajtur “Ura e Kardhiqit”, duke bllokuar aksin Tepelenë-Gjirokastër.
Ata kanë derdhur sasi të konsiderueshme të qumështit në rrugë, ndërsa kërkuan marrjen e masave nga ana e qeverisë ndaj fabrikave përpunuese, pasi këto të fundit, sipas tyre, kanë ulur çmimin me të cilin blejnë qumështin nga fermerët.
Fermerët kërkuan takim me ministren e Bujqësisë Anila Denaj dhe shpalosën katër kërkesa për përmirësimin e gjendjes së tyre.
“Pika e parë është çmimi tavan i qumështit. Pika e dytë janë subvencionet, dyfishimi i tyre. Pika e tretë janë kullotat dhe pika e katër janë veprat ujore, plus dhe ilaçet”, tha një prej protestuesve.
Një tjetër kërkoi marrjen e masave ndaj fabrikave. Blegtorët paralajmëruan vijimin e protestave dhe zhvendosjen e tyre para kryeministrisë.
