Janë zbardhur detaje të reja nga ngjarja e rëndë e regjistruar këtë të enjte brenda ambienteve të Policisë së Durrësit, ku efektivi Arben Pjeçi u gjet i vetëvrarë me armën e shërbimit brenda zyrës së tij.
Sipas autoriteteve, dyshohet se Pjeçi e ndërmari aktin ekstrem në kushte të rënduara psikologjike, pasi ishte pezulluar nga detyra për shkak se ishte dënuar me vendim të formës së prerë nga Gjykata e Shkallës së Parë Durrës, për veprën penale “Plagosje e lehtë”.
“Punonjësi i Policisë, në kushtet e depresionit për penalitetet që sjell vendimi i dënimit të formës së prerë që e kushtëzonte në të ardhmen me ndërprerjen e marrëdhënies së punës me Policinë e Shtetit, është vetëvrarë me armën e shërbimit në ambientet e zyrës së punës, në Komisariatin e Policisë Durrës.” – thuhej në njoftim.
Burime bëjnë me dije se efektivi Arben Pjeçi ishte dënuar për plagosjen e komshiut të tij, i cili po ashtu më parë kishte qenë i veshur me uniformën blu. Mësohet se konflikti mes dy komshinjëve, kishte ardhur pas sherrit që kishin pasur gratë e tyre për një tendë në plazh.
Pra, sherri ka nisur fillimisht mes grave të fqinjëve dhe më pas ka vijuar mes burrave, të cilët kanë përfunduar duke u zënë me grushte dhe shkelma. Ngjarja ka ndodhur në vitin 2022, ku pas sherrit kanë nisur hetimet që çuan në gjykimin e Arben Pjeçit dhe shpalljen e tij fajtor për plagosje të lehtë. Po ashtu, mësohet se dhe komshiu i tij është dënuar për të njëjtën vepër penale.
Kujtojmë se familjarët kishin humbur kontaktet me efektivin Arben Pjeçi dhe kishin njoftuar Komisariatin e Policisë së Durrësit. Këta të fundit, pas kërkimeve në qytetin bregdetar, vendosën të hapin me forcë zyrën e Pjeçit rreth orës 16:15, në ambientet e Komisariatit të Policisë Durrës dhe ai është gjetur i vetëvrarë, me armën e shërbimit.
Për këtë ngjarje është krijuar një grup i posaçëm hetimor, në drejtimin e Prokurorisë së Durrësit dhe oficerëve të Policisë Gjyqësore të Prokurorisë. Gjithashtu, është njoftuar edhe Agjencia e Mbikëqyrjes Policore.
Arben Pjeçi aktualisht ishte në detyrën specialist i Policisë Kriminale në komisariatin e Policisë së Durrësit. Ai kishte një karrierë rreth 35-vjeçare në radhët e uniformave blu.
