Aktivistja Arilda Lleshi, organizatorja e protestës kundër paktit Rama-Melani për ngritjen e kampeve të refugjatëve në Shëngjin dhe Gjadër, paralajmëroi sot se protesta e radhës kundër kësaj marrëveshje do të zhvillohet më 29 janar përpara Gjykatës Kushtetuese, ditën kur pritet të jepet vendimi përfundimtar për këto kampe.
Lleshi tha sot në studion e Kafe Shqeto në SYRI TV se “marrëveshja ishte absurde. Sa herë që njeriu dhe aq më tepër një shtet merr një vendim, duhet të marrë parasysh përfitimet dhe kostot. Në këtë rast, kostot ishin potencialisht të mëdha ndërsa përfitimet ishin zero”.
“Komuniteti do të ndikohej drejtpërdrejt në mënyrë negative nga kjo marrëveshje. Do të ndikohej turizmi në zonën e Shëngjinit dhe potencialisht siguria e zonës së Gjadrit. Ndërkohë që nuk kishte asnjë lloj arsyeje pse ne duhet të bëheshim pjesë e kësaj marrëveshjeje duke qenë se ata emigrantë nuk po vinin tek ne dhe as nuk donin të vinin te ne. Edhe atyre po u bëhet padrejtësi. Pra, bie poshtë detyrimi moral; kostat janë shumë të larta. Kush përfiton nga kjo?! Komuniteti – jo! Shqipëria – jo! Gjykata Kushtetuese njoftoi dje se do të kishte edhe një seancë tjetër më 29 janar dhe ne do të jemi atje për të protestuar dhe në vijim do të shohim se si do të veprojmë”, tha ajo.
“Por në momentin që refugjatët vijnë, nuk do të kishte kuptim të protestonim. Do të protestojmë para institucioneve me arsyetimet tona. Një ndër arsyet pse protestojmë është edhe për drejtat e tyre. Mbajtja e tyre në burgim pa afat dhe pa arsyetim ligjor është një shkelje e të drejtave të tyre. Në fakt do të ishte më me vlerë nëse do ta dërgonim çështjen në Strasburg me një nga emigrantët aty, sepse nuk mund ta dërgosh paraprakisht çështjen në Strasburg për një shkelje të pakonstatuar”, shtoi Lleshi.
