Andi Bushati thotë se fati i Erion Veliajt, varet ekskluzivisht nga Edi Rama dhe vendimi që do të marrë ai, pra do ta lëshojë te SPAK apo jo.
I ftuar në emisionin “Të Paekspozuarit”, Bushati tha se SPAK do të merret me Veliajn, nëse Rama gjykon se Veliaj e rrezikon pushtetin e tij.
“Nëse Veliaj bëhet problem për pushtetin absolut të Ramës, SPAK do të merret. Nëse e sheh si njeriun që shpërndan reklamat, i mbyll punën e pista, që nga Federata dhe deri te Teatri, nuk merret. Historia e SPAK është historia e leje-marrje te Edi Rama. Edi Rama i shkarkon, i heq, i shkel syrin. Në rastin e Ahmetajt, i thoshte po të isha prokuror do e bëja edhe më keq.
Mos krijojmë, jo amerikanët, por edhe Zoti, të na thotë se SPAK vepron në mënyrë të pavarur, të jemi kaq idiotë dhe ti besojmë. SPAK vepron me drejtësi të dirigjuar dhe dirigjenti ndodhet në Kryeministri. Nga kjo varet fati i Erion Veliajt. E do Rama të djegur apo e do në politikë”, tha Bushati.
