Nga Boldnews.al
Kompania e shërbimit të telefonisë së lëvizshme, “One Albania”, është vënë në qendër të akuzave kohët e fundit për një mori problemesh. Mijëra qytetarë janë ankuar për mungesë shërbimesh, duke nisur nga sinjali dobët, shkëputje interneti apo edhe prishje të sistemit. Akuza ka pasur edhe nga abonentë të cilët kishin paguar faturat, por në sistemin e tyre dilnin debitorë. Pavarësisht se kishin fatura të lëshuara nga bankat apo institucionet e tjera, sërish këta qytetarë u endën për shumë javë në dyert e kësaj kompanie. Por, përpos këtyre problemeve, çfarë bëjnë institucionet shtetërore? Natyrisht, në një vend normal, shteti duhet të ishte ngritur në këmbë për të mbrojtur konsumatorin, popullin, sovranin. Por në këtë rast, vetë shteti i jep të tjera miliona nga paratë e këtyre abonentëve. Pra, i jep tendera!
Sipas dokumenteve që disponon redaksia e BoldNews.al, Bashkia e Tiranës ka shpallur fituesin e tenderit “ofrimi i shërbimit online për monitorimin e trafikut urban në Bashkinë Tiranë” për nevoja të Autoritetit Kontraktor Bashkia Tiranë. “Ju informojmë se, në këtë procedurë kanë marrë pjesë ‘VODAFONE ALBANIA’ me vlerë të ofertës pa TVSH prej 40.563.341 lekë dhe “ONE ALBANIA” me vlerë 40.383.527 lekë pa TVSH” thuhet në këto dokumente.
Sipas tyre, firma “VODAFONE” është skualifikuar pasi në preventiv s’kishte disa shërbime si objekt kontrate. “Operatori ekonomik nuk i është përmbajtur formatit të preventivit (pa vlerë) të publikuar nga AK, por ka ofertuar një çmim të përmbledhur nën zërin ‘Dark FO, SIM’” thuhet në këto dokumente. Sipas tyre, duke marrë shkak se tipologjia e shërbimeve, objekt kontrate është e ndryshme, çmimi i ofertuar në total e bën të pamundur identifikimin e çmimeve për secilën tipologji.
Disa javë më parë, redaksia e BoldNews.al denoncoi se një nga problematikat më të hasura në kryeqytet është trafiku i rënduar. “Megjithëse institucionet shtetërorë, administrata apo edhe shkollat janë pushim, sërish pjesa më e madhe e akseve është në trafik, duke rënduar kostot e qytetarëve për të lëvizur. Por, kjo s’e ka penguar kryetarin e Bashkisë së Tiranës Erion Veliaj që të bëjë tendera të kotë. Realizojnë tendera vetëm për monitorimin e trafikut. Një tender i bërë edhe vitin e kaluar, por që në vitin 2023 i është dyfishuar vlera” thuhej në këtë denoncim. Në vjeshtën e 2023, Bashkia e Tiranës ka lajmëruar Agjencinë e Prokurimit Publik se ka në plan të bëjë një tender për të monitoruar trafikun në kryeqytet. Objekti i procedurës së prokurimit ishte “ofrimi i shërbimit online për monitorimin e trafikut urban në Bashkinë e Tiranës”. Fondi limit i kësaj procedure është 41.666.667 lekë, ose mbi 400 mijë euro. Po në vitin 2022 a është bërë një tender i ngjashëm?! Sipas dokumenteve që disponon redaksia e BoldNews.al, Veliaj ka bërë një tender të ngjashëm edhe në 2022-shin. Objekti ishte i njëjtë “ofrimi i shërbimit online për monitorimin e trafikut”. Në vitin 2022 tender kishte një vlerë sa gjysma e këtij aktuali, pra 200 mijë euro. Në atë kohë fitues u shpall kompania “ALBTELECOM” me një vlerë 18.676.960 lekë. Dy firmat e tjera që garuan i s’kualifikuan.
Ndërkohë, ky tender është në konflikt të plotë interesi pasi marketingu i “One Albania” menaxhohet nga kompania e vëllait të Veliajt, GOGEL.
