Një 30-vjeçar shqiptar ka humbur jetën në një aksident tragjik të regjistruar rreth orës 03:30 të mëngjesit të së dielës përgjatë rrugës shtetërore Pontebbana pranë urës mbi Meduna në Zoppola, në provincën e Pordenones, Itali.
Mediat përtej Adriatikut raportojnë se në aksidentin fatal janë përfshirë dy makina: një Mercedes Class A, me dy italianë banues në provincën e Trevisos në bord dhe një Fiat Grande Punto në të cilën udhëtonin dy shtetas shqiptarë me banim në zonën e Pordenones.
Nga hetimet paraprake ka rezultuar se automjeti tip “Mercedes Class A” ka kaluar në korsinë e gabuar duke bërë që t’i përballë automjetit tip “Fiat Punto”, duke u përplasur “kokë më kokë”.
Shoferi shqiptar i “Fiat Punto-s” u transportua në gjendje të rëndë në spitalin e Pordenones, ku fatkeqësisht nuk arriti dot të mbijetonte duke ndërruar jetë. Shoferi tjetër i mjetit “Benz” u transportua me helikopter në spitalin Santa Maria della Misericordia në Udine dhe është në gjendje kritike. Dy të plagosurit e tjerë ndodhen në spitalin e Pordenones, jashtë rrezikut për jetën.
Të dyja makinat janë sekuestruar për hetime të mëtejshme. Rruga shtetërore 13 Pontebbana u rihap për trafikun vetëm në orën 7 të mëngjesit të së dielës, pasi u kryen veprimet e plota hetimore.
