Mbi 100 blegtorë në jug të vendit janë ngritur në protestë ditën e sotme duke bllokuar rrugën që të çon nga ura e Kardhiqit drejt Delvinës dhe Sarandës. Blegtorët tregojnë se fabrikat kërkojnë t’ua marrin qumështin me çmimin më të ulët.
Blegtorët thonë se nuk do ta zhblllokojnë rrugën pa ardhur një përfaqësues nga Ministria e Bujqësisë, ministrja apo zëvendësministri, për t’i takuar dhe sqaruar për problemin e monopolit që po kërkojnë të vendosin fabrikat e përpunimit të qumështit mbi lëndën e parë, qumështin, që ata prodhojnë.
Njeri prej tyre tha: “E bëjmë këtë protestë që të dëgjohet zëri ynë dhe fjala jonë. Të vijnë të na takojnë, të mos rrinë në zyra luksoze atje që i kanë bërë dhe mobiluar me eurot që jep Evropa për ne dhe ata i kanë i kanë kthyer në ofiqe të tyre.
Të vijnë të na takojnë, ku janë?! Nuk nuk kemi asgjë , nuk jemi të dhunshëm, duart në xhepa i kemi. Të vijnë të na takojnë. Jemi njerëz, jetojmë në këtë vend, i japim të ardhura këtij vendi.
Ministrja e Bujqësisë të vijë të na takojnë. Nuk ikim prej këtej po nuk erdhën të na takojnë“.
